Nuummioq nuannaarutigaat
Filmi nuannersoq! Nuummi kalaallit filmiliaannik 'Nuummioq'-mik takutitseqqaarnermi isiginnaariat nuannisartinneqavipput.
Inissat 20-unngitsulluunniit sinnerupput Katuap sapaammi nalunaaqqutaq 18 matuni ammarmagit "Nuummioq" kikkunnut tamatunut takuteqqaartussanngorlugu.
Filmip aallartinngilaataa popcornisiniarlutik tulleriiaattut Sermitsiami sulisup naapitai, filmimik isiginnaarnissartik pissanngatigaat.
Filmi naammat apersorneqartut tamangajavimmik isumaqarput filmi nuannerlunilu tissinartoq.
– Uanga nuannarisorujussuuara. Aamma siornatigut taamaattumik takunikuunngeriarama. Aatsaammi perngaamik filmimik kalaallisoortumik takuvunga, Elisabeth Kreutzmann oqarpoq.
– Filmi ajunngilluinnarpoq. Amerikamiut filmiliarisartagaatut inngilaq. Nunamut tunnganeruvoq, Christian Jeremiassen oqarpoq.
Filmi naammat inuit aniannginnerminni ersaattaattaapput. Filmereerlutik anisut siulliit puusiannapput filmip plakaatitaanik, nipilersugartaanik aammalu puigugassarinngisatsinnik nagguteeqqamik imalimmik. Filmi takusimagaanni taanna pingaaruteqartorujussuuvoq pingaartumik upernaaq nagguteeqqat manngertut mannginnginnerillu oqallisigineqarnerat eqqaassagaanni.
Filmip allagartartaasa ingerlaarnerannik malinnaanissaminnut naammagittassusillit paasitinneqarput 'All animals were killed, eaten and enjoyed during this production' (Uuminnga suliarinninnerup nalaani uumasut tamarmik toqunneqarput, nerineqarlutik mamarsaatigineqarlutillu aaq.)
Takutinneqaqqaarneranit assit uani takukkit