Paarlaasseqatigiilluni ilinniartoq qaratsamigut pilatsittoq
Aqqa Kreutzmann, Maniitsumeersoq, qanittukkut qaratsamigut pilatsippoq. Maanna USA-mi high schooliminut uteqqippoq.
16-inik ukiulimmut Aqqa Kreutzmannimut angajoqqaajusut qutsatigaat, ernertik USA-mi AFS-ermat, napparsimalluni unitsinneqarmat. Misissorneqarmat paasineqarpoq qaratsamigut qaqqortarissatut angitigisumik naasoqarsimasoq.
Nukappiaq Maniitsumi angerlarsimaannarsimasuuguni imaassinnaavoq inuuinnarnissaa qularnarsisimassagaluartoq, angajoqqaat Lauritz aamma Kathrine Kreutzmann aviisimut News-Review, nrtoday.com-imut oqarput.
Aqqa Kreutzmann, USA-mi Oregonimi Sutherlin High Schoolimi paarlaasseqatigiinnikkut atuarpoq. Oktobarip 23-anni uppippoq minutsillu pingasut missaannik sivisutigisumik qanimanartorsiormat ambulancinit napparsimavimmut qaninnerpaamut ingerlanneqarluni.
Tassani CR-scannertimmat paasinarsivoq nukappissap qarasaani qaqqortarissatut angitigisumik naasoqarsimasoq, Portlandimilu Doernbecher Childrens Hospitalimut (meeqqat napparsimaviat aaq.) nuunneqarpoq.
Nakorsat naapertorlugit qarasaani naasoq aseruuttoorneruvoq qaqutigoorluinnartoq. Nakorsat aamma naliliipput naasoq ajornanngitsunnguamik pilallugu peerneqarsinnaasoq.
Aqqa Kreutzmannip suliaritinnginnerani angajoqqaavi Kalaallit Nunaanniit USA-mut timmisartorlutik aallarput.
Oktobarip 28-anni nukappiaq pilatsippoq, ajunngitsumillu qaangerpaa. Aqqa Kreutzmann Kalaallit Nunaanni Taekwon-dortartuuvoq, nunalu tamakkerlugu sungiusaasup Lauritz Heilmannip Aqqa pilatseqqammersoq oqaloqatigaa.
– Ajunngilaq sanngiillunili. Aniguilluarnissaannik kissaapparput sungiusaqqilernissaannillu iluatsitsilluaqqullugu, Lauritz Heilmann sermitsiaq. gl-imut oqarpoq.
Aqqa pilatsereermat angajoqqaavi Kalaallit Nunaannut uteqqipput, maannakkullu Aqqa atuarfimminut uteqqereerpoq.
– Maaniinnera suli nuannaraara, Aqqa Kreutzmann nrtoday.com.-imut oqarpoq.
Aqqap inuunermut isiginnaataasia ilinniartut siunnersortaata Sydney Richardsonip tupigusuutigaa.
- Isumaqarpunga sapiitsuusoq qunusuillunilu, Aqqa Kreutzmannip atuarfimminut uteqqinnissaminik Sutherlinimiiginnarnissamillu aalajangernera pillugu ilinniartitsisua aviisimut oqarpoq.