Anorersuup siorna nipaallisimaarneq
– Jens B. Frederiksenip kommunillu akornanni Illuut A/S pillugu oqaasiinnakkut isumaqatigiittoqarpoq, Kuupik Kleist oqarpoq.
Ataatsimiinneq sivikitsunnguamik nal. 20.30 nangikkaluariarlugu inatsisartut siulittaasuata Josef Motzfeldtip ataatsimiinnerup aallarteqqinnissaa 21.15-imut kinguartippaa, taamaasillutik partiit inatsisartut ataatsimiittarfianni oqallinneq ilaatigut misigissutsinik sakkortuunik saqqummiussiffiusoq tamuaqqaalaarniassammassuk.
Siumut aamma Atassut kissaateqarput ineqarnermut naalakkersuisoq Jens B. Frederiksen tunuassasoq.
Partiit taakku marluk isumaqarput Jens B. Frederiksen eqqunngitsumik paasissutissiisimasoq Hans Enoksenip, Siumumeersup apeqqutaannut, oqarami kommunit sisamat borgmesteriinik isumaqatigiissuteqareersoq, pilersaarutigineqartoq Illuut A/S aqqutigalugu, illoqarfinni sisamani siuarsakkani inissialiornissamik.
Kommunit kattuffiata KANUKOKA-p siulittaasua Enok Sandgreen, Siumut, naapertorlugu borgmesterit pineqartut sisamat namminerlu Jens B. Frederiksenip isumaqatigiissuteqarnermik oqaatigisaanik ilisimasaqanngillat. Enok Sandgreenip ilumoornerarpaa qaammatit kingulliit ingerlaneranni arlaleriarluni ataatsimiittoqartarsimasoq, Jens B. Frederiksenilu Illuut A/S-imut pilersaarumminik kommuninut ilisimatitsissuteqartarsimasoq.
– Borgmesterit attavigereerlugit ilisimasaqanngilanga isumaqatigiinniarnermik pisoqarsimaneranik, Enok Sandgreen oqarpoq.
Tamanna tunngavigalugu Atassutip Siumullu inatsisartuni siulittaasui Malik Berthelsen aamma Finn Karlsen Jens B. Frederiksenimik tatiginnikkunnaarnermik saqqummiussipput.
Tatiginnikkunnaarnermik saqqummiussineq naalakkersuisuutitaqartut sinnerlugit Niels Thomsenimit tunuartinneqarpoq.
Naalakkersuisut siulittaasuata Kuupik Kleistip, Inuit Ataqatigiit, tatiginnikkunnaarnermik saqqummiussinermut tunuartitsineq nassuiarpaa Jens B. Frederiksenip kommunillu akornanni isumaqatigiissut oqaasiinnakkut isumaqatigiissutaasoq unnerlugu.
Illuatungiliuttulli isumaqarput inissianik milliardinik nalilinnik sanaartornissamik isumaqatigiissut oqaasiinnakkoorani allakkatigut ingerlanneqartariaqartoq.
Minutsini makkunani sumi tamaani ataatsimiittoqarpoq, sermitsiaq.gl-imullu oqaaseqartut ilaata oqarnera naapertorlugu:
– Aatsaat perngaamik KANUKOKA-p siulittaasuata tungaaniit naalakkersuisunut ilaasortamik uppititsiniartoqarpoq....