Aalisartut siunissamut piareersarneqartut
Kommuneqarfik Sermersooq tunumi aalisartunik piniartunillu atuartitsilluni aallartippoq.
KNAPK suleqatigalugu Kommuneqarfik Sermersuup sapaatit akunnerini tulliuttuni aalisartut piniartullu Illoqqortoormiunit Tasiilamiillu pikkorissarnissaat aaqqissuuppaat, sermersooq.gl allappoq.
Pikkorissartitsinerup siunertaraa maannakkut aalisartut aalisartunngorumaartussallu aalisarnermik pikkorissartinneqarnissaat. Tamatuma saniatigut motorilerinik paarsinermik ilitsersuunneqassapput, angallatinik glasfiberinik iluarsaassinermik sungiusassapput aammalu angallatitaarniarnermi periutsinik ilitsersuunneqassallutik.
Ukiup tulliani aalisarneq pillugu sammisaqartitsisoqarlunilu pikkorissartitsisoqassaaq, maannakkut pikkorissartitsereernerup kingorna KNAPK-p, Imarsiornermillu Ilinniarfiup Paamiuniittup Kommuneqarfik Sermersuullu suleqartigiillutik ilusilersugassaannik.
Illoqortoormiuni pikkorissarneq ingerlanneqassaaq novembarip 13-ianiit 17-ianut, Tasiilamilu novembarip 23-anniit 29-annut.