Politikkerit hashitortarnersut misissuisalertoqassanngilaq
Doris Jakobsenip qinikkat quuinik aavinillu misissuisalernissamik siunnersuutaa Naalakkersuisut tapersersunngilaat.
Aaversinnikkut quumillu misissuineq kisiat atorlugu uppernarsineqarsinnaavoq qinikkat aammalu Naalakkersuisut aanngajaarnartunik atuisuunersut.
Inatsisartunut ilaasortap Doris Jakobsen, Siumut apeqqut pingaartittorujussuugaluarpaa, taamaammallu Inatsisartunut siunnersuuteqarluni Kalaallit Nunaanni qinikkat pinngitsooratik aassiorlugillu quuinillu misissuisoqartalissasoq.
Naalakkersuisut nangaassuteqaratik siunnersuummik itigartitsipput, tamanna Naalakkersuisut akissuteqaataanni takuneqarsinnaavoq.
– Naalakkersuisut pinngitsaaliilluni imaluunniit nammineq piumassuseq naapertorlugu qinikkanik misissuisoqartalernissaa tapersersunngilaat, politiit patsisissaqarlutik pasisaqanngippata. Inuiaqatigiinni inuit aalajangersimasuit inatsisitigut illersorneqarnerannit illuartillugit misissorneqartalernissaat tapersersunngilarput.
– Pinngitsaalissummik misissuisalernissaq eqqunneqassagaluarpat Inatsisartut nunarsuarmi naalakkersuinermik sulialinnit siullerpaajullutik misissuiffigineqartalissagaluarput, Kuupik Kleist akissuteqaammi allappoq.
Siunnersuut ullormut oqaluuserisassat naapertorlugit tallimanngornermi Inatsisartuni oqaluuserineqassaaq.