Røde Kors naluttarfimmi takutitsilerpoq
Nuummi naluttarfik Malik tallimanngorpat Kalaallit Røde Korsiata katersuiniarnerminut atatillugu takutitsiffigissavaat.
Tallimanngornermi takutitsinissami Kalaallit Røde Korsiat (KRK) sapaatip akunnerani naasumi katersuiniarnerata nanginnerissavaa.
Kalaallit Røde Korsiata Nuummi immikkoortortaata naluttarfik Malik iniliullugu tallimanngornermi oktobarip 9-ani nalunaaqqutaq 19.00 matut ammassavai, Nuummi immikkoortortami siulittaasup tulliata Lissi Olsenip oqalugiarneratigut.
Unnuup sinnera erinarsortartoq Kimmernaq aqutsissaaq.
Malimmi sulisut annaassiniartuusaassapput kajakpolortartullu qaannamik qanoq pikkoritsiginerlutik isiginnaartunut takutissavaat. Anda Uldum meeqqanik aliikkusersuissaaq kiisalu aaqqissuisut nalunaarput Pikkori Sportip kusanartunik takutitsisulerluni saqqummiussissasut, qunusuitsut piginnaanerminnik takutitsissapput kiisalu tusaamasanik takusassaqassajunnarsivoq.
Iserneq inersimasunut 50 koruuneqassaaq aningaasallu isertinneqartut tamarmik Røde Korsip meeqqanik inuusuttunillu sullissinerannut nakkassapput. Meeqqat akeqanngitsumik isersinnaapput. Kalaallit Røde Korsiannik tapersersuisoq Arctic Import checkimik tunniussassaqarpoq. Kalaallit Nunaanni Arctic Importip kaffinit tunisaannit koruuni ataatseq KRK-imut nakkartarpoq.