Angajoqqaavisa Thor tigummiinnarumavaat
Kalaallit Helene Mortensenip Bjarne Würglerillu ernerminnik qimarmussinermik kingorna arsaagaanissaminnik aalajangiineq Tønderimi eqqartuussivimmut ingerlateqqippaat.
35-nik ukiullip Helene Morensenip 36-nillu ukiullip Bjarne Würgler-Hansenip ernertik Thor tigummiinnarusuppaat, ekstrabladet.dk allappoq.
Thor juunip 23-anni inunngorpoq, angajoqqaajusulli uppernarsarneqarsinnaasumik ikiaroornartumik atornerluisuunerarneqarmata Tønderip kommuniani oqartussaasut Thorip arsaarinnissutigineqarluni allamut inissinneqarnissaa aalajangiunneqarpoq.
Naalungiarsuup Sydvestjysk Sygehusimi Esbjergimiittumi inunngorneraniit ullut qulit qaanggiuttullu angajoqqaajusut uippallilerlutik Thor Tjekkiamut qimarnguppaat.
Bjarne Würgler-Hansenip biilia qernertoq Audi 100 atorlugu ulluni 13-ini qimaaqqareersullu Tjekkiami illoqarfimmi Brnomi pisiniarnerini tigusarineqarput.
Danmarkimut oqqunneqaramik angajoqqaajusut ernermik inuunera ulorianartorsiortillugu qimarngussisimasutut unnerluutigneqaeput, Helene Mortensenikkulli Bjarme Würgler-Hansenillu Thorip siunissaa pillugu pilersaarutit akuersissutigigamikkit iperagaaqqipput.
Naliliisartulli aamma piumasaraat, angajoqqaajusut angajoqqaatut isumaginnissinnaassusiat Tønder Kommunip misissortissagaa. Oqaaseqatigiillu taakku angajoqqaat advokatiata Stine Skyum Kristensenip periarfissamik ammassisutut isigai.
Angajoqqaajusut Stine Skyum Kristensen ippassaq suliassaq illoqarfiup eqqartuussivianut tunniuppaat neriullutik Ankestyrelsip aalajangigaa allanngortinneqarumaartoq, dr.dk/syd taama allappoq.