Ivittuuni umimmaat amerlipput
1987-mi umimmaat 15-it Kangerlussuarmiit Ivittuunut nuunneqarnerisa kingorna, ukiut ingerlanerini umimmaat amerliartortuarput. Massakkut umimmaat 780 - 800 missaanniillutik.
1995-imi taamani Ivittuup kommuniusoq umimmannik piniarsinnaanermut allagartanik agguaassisalerput, suli taanna pissuseq ullumikkut atuuttoq, sermersooq.gl allappoq.
Per Nukaaraq Hansen aallaqqaammulli umimmanniarsinnaanermik akuersissutinik tunniussisartoq aamma suli taamatut atuuppoq:
- Taamanili kommunalbestyrelsiusartut pingaartillugu malinnaaffigaat umimmat 1000-t sinnissanngikkaat. Tamatuminnga tunuliaqutaqarluni ukiumut piniarneqarsinnaasut amerlassusissaat aalajangerneqartarpoq. Aamma aalajangertarparput umimmaat sorliit aallaaneqarsinnaanersut. Taamaasilluta umimmaqassutsip qanoq issusaa malinnaaffigisinnaavarput.
Umimmaat ukiumut marloriarlutik kisinneqartarput, kisitsineq ulluni pingasuni sisamaniluunniit sivisussuseqartarpoq, Per Nukaaraq Hansen, oqarluutarpoq.
- Umimmaat sumiiffimminniit nikerujussuarneq ajorput taamaammat kisitsisaatigut eqqortorujussuupput. Septembarip qaammataani pisummik immakkullu kisitseqqissaartarpugut, iluatsillugu umimmaat suiaassusii allattortarpagut. kisitsisussanngoraangattalu silap qanoq issusaa aamma malinnaaffiginiartarlutigu, Per Nukaaraq Hansen oqaluttuarpoq.