Juaaka: Miss Inuit 2009 assigiinngisitsivoq
AG-p unammisitsinerani "Miss Inuit 2009" arnat peqataajumasut ilivitsumik affarmilluunniit kalaaliussapput, tamannalu isornartoqarpoq, Juaaka Lyberth isumaqarpoq.
KNR-imi radiokut aallakaatitassiami AG-mi ussassaarinermut pisortaq oqarpoq "Miss Inuit 2009"-mi peqataaniartut tamakkiisumik affarmilluunniit kalaaliussasut. Tamanna isornartoqarpoq, Kulturip illorsuani Taseralimmi pisortaq Juaaka Lyberth isumaqarpoq.
– Soorunami AG-p aaqqissuisoqarfiata aalajangissavaa imminut sammitinniarluni aviisinillu amerlanerusunik tunisaqarniarluni qanoq aliikkusersuiniarnerluni. Unamminermulli peqataanissamut piumsaqaatinut tupigusuppunga, tassalu peqataasut "tamakkiisumik affarmilluunniit kalaaliussasut". Allatut oqaatigalugu arnat allat peqataaqqusaanngillat! Isumaliutigaara AG, imminut Inuit Aviisiannik taasoq, akulerutsitsinnginnissamik politikkimik ingerlartsilinnginnersoq, assigiinngisitsinermut assingusumik, Juaaka Lyberth atuartartutut allakkamini allappoq.
Kalaallit Nunaata Danmarkillu ataatsimut FN-imut saaffiginnissutissartik ilusilersuleruttorpaat, tassa inuit fKalaallit Nunaanni najugaqartut kalaallisut inuiattut akuerineqarnissaat.
- Arlaannik mattussisoqarpat tamanna FN-ip inuit pisinnaatitaaffiinut unioqqutitsineruvoq, tassa FN-ip inuit pisiginnaatitaaffiinut nalunaarummi 1948-meersumi allassimammat innuttaasut - naalagaaffimmi inuit ataasiakkaat naalagaaffimmut atatillugu inuttut pisinnaatitaaffeqartut. Kalaallit Nunaanni tassa Namminersornermut Oqartussanut atatillugu. Tassa imaappoq, FN-imit inuittut akuerineqarnikkut FN-imit isigalugu innuttaasut/najugaqartut amiat qanorluunniit qalipaateqaraluarpat inuiattullu qanoq tunuliaqutaraluarpat assigiimmik pisinnaatitaaffeqarlutillu pisussaaffeqartut, Juaaka Lyberth allappoq.