Art Copenhagenimi kalaallinit eqqumiitsuliaat tunisaalluarput
Eqqumiitsuliat sisamaraterutaasa tunineqarnerat Søren Thalunip Københavnimi Kalaallit Illutaanneersup iluatsitsilluarnertut nalilerpaa.
Art Copenhagen sapaammi ualikkut matulersoq saqqummersitanit 42-nit aqqanillit tunineqarput. Taakku suliaapput eqqumiitsuliortunit kalaallinit ukuusunit: Buuti Pedersen, Kristian "Aaju" Olsen, Gukki Willsen Møller, Line Hvass, Bolatta Silis-Høegh aamma Jessie Kleemann.
- Qaaqqusanit 12-sunit eqqumiitsuliortut arfinillit peqataapput. Tamanna ajuusaarutigaarput. Maani peqataasut nittarsaanneqarluarput. Sapaatip akunnerata naanerani silagissuaq unamminaraluartoq, kalaallit saqqummersitsiviat ornigarneqarluarpoq, Søren Thalund oqarpoq.
Eqqumiitsuliortoq Buuti Pedersenip, ukiut 15-it matuma siorna igalaaminernik suliaqartalersup, saqqummersitami ilaat taavaa "Lavskål." ("Issuatsiaat" aaqq.) Skålimut isumassarsiffiuvoq qaqqani issuatsiaat qorsooqqissut.
- Tupinnaqaaq. Nuannaarutigaara Glasmuseet-ip suliakka taama nalilermagit, Buuti Pedersen nuannaaqisoq oqarpoq. Nittarsaassinersuarm igalaaminernik eqqumiitsuliornermik piginnaanilinnik nutaaliortunillu ujaasisut Glasmuseet Ebeltofts folk, oqaloqatigeqqammerlugit.