Kommuneqarfik Sermersooq atorfinitsitsinngikkallassaaq
Aningaasanut missingersuut 25 millioninik qaangerlugu atuisoqarnera pissutigalugu Kommuneqarfik Sermersooq sulisunik nutaanik ingerlaannaq atuutilersumik atorfinitsitsiunnaarpoq.
Ippassaq marlunngornermi Kommuneqarfik Sermersuumi kommunalbestyrelsi ataatsimiittoq ilisimatitsissutitut tusarlerneqarpoq, kommunip aningaasartuutaasa missingersuutaat 25 million koruuninik qaangerneqassasut, sermersooq.gl taama allappoq.
Tamassuma kinguneranik sulisunik nutaanik atorfinitsitseqqusiunnaarneq ingerlaannartumik kinguneqartinneqarpoq.
Pingaartumik kommuunip allaffissornikkut missingersuusiaasigut qaangiisimaneq eqqumaffigineqarpoq, tassani 22 mio. koruuninik qaangiisoqarsimammat. Qaangiisimaneq sulisut amerlineqarsimaneranik peqquteqartinneqarpoq.
Missingersuusianik qaangiineq allaffissornikkut sulisunik nutaanik ingerlaannartumik atorfinitsitseqqusiunnaarnermik kinguneqarpoq, qaangiisimanerillu killilersimaarniarnissaannut suliniutinut tapertaritillugu ingerlatsivinni pisortat namminneq ingerlatsivimminni sipaarniarfiusinnaasunik ujartuissapput.
Aammattaaq kommuunit iluarsartuunneqarneranni iluaqutaasinnaasunik pissarsiarineqarsinnaasat periarfissiissutigineqarsinnaasut eqqarsaatigalugit allaffissornikkut suliassat atorfiillu nalilersorneqassapput. Taamatuttaaq atorfimmut atatillugu angalasarnissat ingerlatsivinni pisortanit akuersissutigineqartalissapput.
Ilisimatitsissutitut saqqummiussani ilisimatitsissutigineqarpoq missingersuusianik misissuinerit inerneri nalorninartulerujussuusut, tassami missingersuusiornermi akissarsialerutinik nutaanik atuilersimaneq aammalu kontolersuinermi pilersaarummik nutaamik akuerisaasumik atuilersimaneq suliamik ajornarnerulersitsisimammata. Tamatuminnga suliaqarnerup piffissap naatsorsuuteqarfiusup suli naannginnerani naammassineqarnissaa ilimagineqarsinnaanngitsutut oqaatigineqarpoq.
Kommunalbestyrelsip ilisimatitsissut tusaatissatut tiguaa.