Aappassaanik Kulturisiorfik
Kommuneqarfiit sisamaasut katillugit 800.000 kroninik tapiiffigineqarput ukiumoortumik kulturisiorfiup nalliussineqarnissaanut atugassanik.
Nunatsinni kommunerpassuarni 2008-mi kulturikkut ulloq siullerpaamik malunnartinneqarpoq. Ukioq manna aamma kulturip ullua malunnartinniarlugu Namminersorlutik Oqartussat kommuninut sisamanut inuit amerlassusaat naapertorlugu 800.000 koruunit agguaappaat.
- Kultureqarnermut Naalakkersuisutut kissaatigaara aningaasat taakku nunatsinni misigisanut nuannersunut tapertaalluassasut, Mimi Karlsen oqarpoq.
Ullulli tamaasa kulturitsinnik aallutaqarnissamik kiffaanngissuseqarnerput Mimi Karlsen-ip eqqaamaqquaa, suleqataaffigerusullugulu ulluinnarni kulturitsinnik aal-lussinerput siunissami oqinnerulissasoq.
- Kulturitoqqatsinnik ulluinnarni atorluaasinnaanerput paasiartorparput. Qanga atortut periutsillu nutaanik akoorlugit atorluartalereerpavut, taamaaliornitsigullu aamma kulturerput tamatigoortoq tammatsaaliorlugu.
- Siunissami eqqumiitsuliorneq kulturitsinnillu assigiingitsutigut aallussineq tassaasariaqarpoq tamatta ulluinnarni soqutigisagut assigiinngitsorpassuit aallaavigalugit aallussinerput pinngortitsinerpullu, Kultureqarnermut, Ilinniartitaanermut, Ilisimatusarnermut Ilageeqarnermullu naalakkersuisoq Mimi Karlsen taama naggasiivoq.