Kuupik: Ineqarnermut akiliutip qaffannissaa naapertuuppoq
Namminersorlutik Oqartussat illut attartortitaasa akii ukiut marluk qaffannikuunngillat, illut ilaatigut pisortanit najugarineqarput.
Naalakkersuisut siulittaasuata Kuupik Kleistip pingasunngornermi ammaanersiorluni oqallinneq naalersoq tamanna paasissutissiissutigaa.
Naalakkersuisut siulittaasuata eqqaasitsissutigaa Naalakkersuisut illunut attartortitanut akiliutip ukiut tamaasa aalajangernissaannut pisussaaffeqarlutik.
- Ajoraluartumik siorna illunut attartortitanut akiliutip qaffannissaa taamani naalakkersuisuusunit pinngitsoortinneqarpoq, taamaattumik qaffariaatissanik kinguaattoortoqarpoq, Kuupik Kleist oqarpoq.
Illut attartortittakkat ilaatigut sulisunit pisortanillu inigineqarput, taamatullu attartortittakkanut nalinginnarnut soorlu inissiarsuarni attartortut akiliutaannit appasinnerusumik inissisimallutik.
- Isumaqarpugut pissusissamisoortoq pisortat suliffeqarfiutaanni atorfillit aningaasarsiarissaartut attartortutuulli allatut akiliuteqartassappata, Kuupik Kleist oqarpoq.
Ineqarnermut naalakkersuisoq Jens B. Frederiksen naapertorlugu pisortat inaannut akiliutit agguaqatigiissillugu kvadratmeterimut 500 koruuniniit 800 koruuninut qaffanneqassapput, illunilu ilaqutariinnut marlunnut najugaqarfiit 500 koruuniniit 700 koruuninut qaffappata.