Skip to main content

Kalaallit Nunaat namminiilivinnissamut mikivallaarpoq

Kalaallit Nunaat qaquguluunniit naalagaaffittut namminiilivissinnaanngilaq, tassa nunap innuttaasui ikippallaarujussuarput, Tuluit Nunaanni aningaasaqarnermut professori oqarpoq, taassuma Islandip aamma Kalaallit Nunaata assigiissutai nalilersorpai.

Nunat mikisut soorlu Kalaallit Nunaat aamma Island aningaasarsiornikkut sanngiippallaarput nunarsuarmi aningaasarsiornermut peqataanissaminnut. Aningaasaqarnermut professorip Anne Sibertip, Londonimi Birkbeck Universitetimeersup tamanna qulariunnaarsimavaa, Islandip aningaasaqarnermigut ajutoorujussuarnera takoreerlugu. Tamannalumi qaninnerpaamik malinnaavigisimavaa, tassani nunami allameersutut Islandimi Centralbankimi politikikkut toqqagaalluni komitéani ilaasortaagami, knr.gl allaaserisaqarpoq.

Ungasinngitsukkut nittartagaq aqqutigalugu inuiaqatigiinnik ilisimatusarnermut tunngasunik atuagassiami Vox-imi allaaserisaa saqqummiunneqarpoq. Allaaserisami tassani Kalaallit Nunaat nunatut namminiilivikkaluaruni Islandip aningaasaqarnikkut ajutoorneratulli periaannaanerarpaa. Aperineqarami Kalalalit Nunaat naalagaaffitut namminiilivinnissamut mikivallaarnersoq akissutaa paatsuugassaanngilaq:

- Aap, Kalaallit Nunaata innuttai Islandip innuttaanut naleqqiullutik tallimararterutaannaapput, taamaammat Kalaallit Nunaat imaaliallaannaq inuttuseriarsinnaanngilaq aammalu inuit allaffissornikkut naalagaaffimmik ingerlatsisinnaasut pisariaqartitani imaaliallaannaq pissarsiarisinnaassanagit, Anne Silbert oqarpoq, tamatumalu saniatigut tikkuarlugu naalagaaffiit mikisut allatigut aamma mianerisassaqartut.

- Ajornartorsiutit ilagaat sillimmasiineq. Kalaallit Nunaat namminiilvissimasoq aningaasaqarnermigut annertuumik ajornartorsiuleruni, nunamit allamit anginerusumik qulakkeerunneqarsinnaanngilaq. Inuit ikittuunerat pissutaalluni naalagaaffiup ingerlanneqarnera inuit amerlassusiat apequtaatillugu inummut ataatsimut akisunerusarpoq. Tamatuma saniatigut nunat mikisut atuinermikkut aamma tunisassiornermikkut nikerarnerujussuusarput. Suliffissuit amerlanngitsut ingerlanissamut apeqqutaapput, taamaattumik suliffissuaq ataaseq ajornartorsiulerpat, taava nuna annertuumik eqqugaassaaq. Aamma allamik ajornartorsiuteqarpoq, tassalu ilimanaateqarluinnarpoq nunani mikisuni kiisalu nunat immikkoortuini namminersortuni, inuit imminnut ilisarisimanerat politikikkut aaqqissuussinermi sunniuteqartartorujussuusut, tamatumalu kingunerisaanik ilaquttanik kammalaatinillu atorfinitsitsisarneq aamma aningaasanik akiliilluni sunniuteqarniarneq pisinnaapput, Anne SIbert oqarpoq.

Taamaattumik Kalaallit Nunaannut siunnersuissaguni, siunnersuinera tassaavoq:

- Kalaallit Nunaat naalagaaffittut namminiilivittariaqanngilaq, kisianni Danmarkilu naalagaaffeqatigiiginnassapput, taamaaliornikkut qulakkeerussisoqarsinnaavoq, Anne Sibert oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER