Oqqiffik utaqqisinneqarpoq
Siumup inuusuttaasa qimarnguik pisariaqartinngilaat, taamaallaalli immaqa orniguttarfik, Siumut Atassullu taamatut isumaqarput. IA-p siunnersuuttaa maanna ataatsimiititaliami oqaluuserisassanngortinneqarpoq.
Qimarnguimmik imaluunniit oqqiffimmik taaguuserneqarnissaanut apeqqutaavoq suna pingaarnerutinneqarnersoq - katsorsartinnerunersoq imaluunniit pinaveersaartitsinerunersoq. Sisimiuni inuusuttut orniguttarfiat Nutaraq matuppat inuusuttuaqqanut inuusunnerusunut nalunaaquttap unnukkut aqqarngup kingorna aneeruusaartartunut oqqiffeqalernissaannik IA-p siunnersuutaa utertinneqarpoq ataatsimiititaliami oqaluuserisassanngorlugu. Siumut aamma Atassut marlunngornermi kommunalbestyrelsimi oqallinnermi pingaarnerutippaat "orniguttarfik".
– Neqeroorutaasut amerlineqarnissaasa misissuiffigineqarnissaat sulissutigissavara, neqeroorutit amerlineqarnerisigut inuusuttuaqqat siusissukkut imigassartortalersartut, hashitortalersartut aammalu susassaaleqisartut ilanngunneqarsinnaalerniassammata, Bitten Heilmann, Atassut, taamatut oqarpoq.
Ilaqutariinnut ataatsimiititaliami siulittaasup tulliata, Alfred Olsenip, Siumut, aamma paaserusuppaa ajornartorsiut tamanna qanoq annertutiginersoq.
– Isumaginninnikkut ajornartorsiuteqartunut inuusuttuaqqanut, ilaqutariinnut orniguttarfimmit ilaqutaat sullinneqareersunut, suliniuteqarnissamut aamma inuusuttuaqqanut taakkununngarpiaq immikkut sullissisartunut - miljøarbejderinut - aningaasarpassuit immikkoortereerpagut, oqarpoq.
Katrine Larsen Lennertip, Inuit Ataqatigiit, qularutiginngivippaa inuusuttuaqqat - nammineq taaneratuut - oqqiffeqalernissartik iluaqutigissagaat.
– Pinaveersaartitsineq nalinginnaasoq pinngikkaluarparput, kisianni inuusuttuaqqanut imigassartortalersut hashitortalersullu suli inuusussigaluttuinnartut ikorneqarnissaat pivagut. Qimarnguimmi tusarnaarneq pisariaqartarpoq inuusuttuaqqallu unnukkut aqqarngup kingorna aneeruusaartartut atugarliortullu ikiorneqarnissaannut aalajangersimasumik neqerooruteqartoqartarpoq.
Ilaqutariinnut ataatsimiititaliap aamma atuarfimmut, kulturimut aamma sunngiffimmut ataatsimiititaliap Sisimiuni meeqqanut inuusuttuaqqanullu isumaginninnikkut ajornartorsiortunut neqeroorutit qimerloorneqassapput, IA-p siunnersuutaata kommunalbestyrelsimi saqqummiuteqqinneqassanersoq pillugu ilaqutariinnut ataatsimiititaliap aalajangiitsinnagu.