Illersornissami sakkutuut naalagaat Nunatsinni
Forsvarschef Tim Sloth Jørgensen maannakkorpiaq Kalaallit Nunaanniippoq Issittumi angalaarnerminut atatillugu.
Canadami aamma taamatut atorfilik ingiaqatigalugu qallunnaat nunaanni illersornissamut sakkutuut naalagaat Tim Sloth Jørgensen marluinngormat Nuummiippoq, taakku ataatsimeeqataasa ilagaat Naalakkersuisut siulittaasuat Kuupik Kleist. Ulluni makkunani illersornissamut sakkutuut naalagaat Pituffimmiippoq.
- Soorlu assersuutigalugu imartanik nakkutilliinermi, imaatigut annaassiniarnermi aamma imaani mingutsitsinnginnissamik nakkutilliinermi Kalaallit Nunaat tamakkerlugu nakkutilliivigissallugu annertoorujussuuvooq. Silaannaap allanngoriartornera kiisalu umiarsuit tamaani angallattut amerlinissaasa naatsorsuutigineqartup pisariaqartilerpaa, maannakkut uagut Kalaallit Nunaanni atorsinnaasatta pitsaanerpaamik atorluarnissaat qimerloortariaqaleratsigu, tamakkulu tamaani illersornissamut oqartussat siunissami tamaani suliassaanut tulluarsarlugit aaqqissuussisariaqarpugu, illersornissamut sakkutuut naalagaat Tim Sloth Jørgensen, forsvaret.dk malillugu oqarpoq.
Issittoq tassaavoq nunarsuup kissatikkiartornerata kingunerisaanik maluginniffiusinnaasorujussuaq, tassami siku aappat umiarsuit ingerlavissaat nutaat ammaanneqarsinnaapput, tamatumalu kingunerisinnaavaa umiarsuit angallattut amerlinerat. Ungasinngitsukkut danskit illersornissaq pillugu folketingimi isumaqatigiissutigineqartumi tikkuarneqarpoq aammattaa illersornissaqarfiup Issittumi suliassaanut silaannaap allanngoriartornera sunniuteqarumaartoq.
Kalaallit Nunaannut tikeraarnissani sioqqullugu illersornissami sakkutuut naalagaat illoqarfimmi Iqalunniippoq, taanna cadamiut Issittortaani illoqarfiit pingaarnersaraat. Tamaani Tim Sloth Jørgensenip canadamiut illersornissamut sakkutuut naalagaat general Walter Natynczyk ataatsimeeqatigaa, oqaloqatigiissutigisaasalu ilagaat Issittumik umiarsuit amerlanerusut angalasalernissaat:
- Sikup aannera ilutigalugu taava umiarsuit angallavigisartagaat allanngussaaq, tamatumalu kingunerilluarsinnaavaa umiarsuit tamaani angalasartut amerlinerat. Taamaattumik pissusissamisoorpoq misissussallugu, nunat issittumiittut tamaani qaninnerusumik suleqatigiinneq iluaqutigisinnaaneraat. Danmark aamma Canada tamatumunnga tunngatillugu assigiinngitsunik eqqarsaateqarsimapput, tassalu ilaatigut tamakku uanga tikeraanninnut atatillugu canadami uattut atorfilillu oqaloqatigiissutiginiakkagut, illersornissami sakkutuut naalagaat Tim Sloth Jørgensen forsvaret.dk malillugu oqarpoq.