Skip to main content

Arfiviit pillugit ilisimasat nutaat

Aarhus Universitetimit Kalaallit Nunaata Pinngortitaleriffianit ilisimatusartut paasivaat arfiviit nunarsuarmi uumasut kiisortut annersarigaat uumasuaqqanik tappiorannartunik milliarderpassuarnik arriitsuararsuarmik piniarniartartoq.

Naak ingerlaaraangami tiimimut agguaqatigiissillugu 2,5 km ingerlasaraluarluni arfiviup ullormut 80.000 tonsi imeq soqqakkoortittarpaa, assersuutigalugu danskit 2.000-t ukiumut imeq atortagaat.

Paasisat nutaat nunat tamalaat akornanni ilisimatusarnermit nutaarsiassiivimmit akuerisaasumit The Proceedings of the Royal Society-mit saqqummiunneqaqqammertut, au.dk allappoq.

Arfivik arfernit soqqalinnit kisiartaalluni uumanini tamaat issittup imartaaniittarpoq.

Maannamut eqqoriaannarneqartarpoq uumasorujussuit taakku qanoq isillutik taama sivisutigisumik aqqarsimasinnaanersut, aqqaqqanerminni erngup oqimaatsorujussuup tungaanut ingerlasaramik qanertik ammatillugu. Nunarsuarmi uumasut annersaasa qanoq isillutik nerisarneri paasiniarlugit ph.d.-imik ilinniagaqartoq Malene Simon taassumalu siunnersortaa lektor Peter T. Madsen Diskobugtemi arfiviit nerisut qarasaasiaaqqanik uuttuutitalinnik ikkussuivigaat.

Immami miluumasunut allanut naleqqiullutik arfiviit aqqaqqatillutik qanertik ammarlugu neriitigalutik ingerlaaraangamik sarpissuinnaavittarput. Arfinut allanut taama ingerlaneq nalinginnaasumik iltimik atuiffiusorujussuussagaluarpoq, maannali ilisimatusartut paasivaat arfiviit arriitsumik sarpissornermikkut iltimik ileqqaartartut. Tassa arfivik arriitsumik siumut neriitigaluni ingerlaarujoortarpoq nalinginnaasumik arferit allat ingerlaneranniit pingasoriaammik kigaannerullutik. Taamaasillutik imeq ajattagartik oqimaatsorujussuaq qanermillu ammalluni imermik aqqusaarneqarnerata nalaani nukimmik atuilluarfiginiartarlugu.

- Tassa nunarsuarmi uumasut kiisortut annersaat eqqumiikkaluartumik kigaatsuararsuarmik ingerlalluni piniartarpoq. Arfiviup ingerlaarsinnaanera immikkuullarilluinnarpoq issittumi immap kumaanik neriniarnermut naleqqussarluarsimalluni, tamakkumi miluumasumit arriitsuararsuarmit periaasilimmit qimaasinnaanngillat, Malene Simon oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER