Akiligassat akilerneqartinnagit kanal-TV matoqqassaaq

Sisimiut TV-p siulersuisui aallarteqqipput immikkullu ittumik ataatsimeersuareernerup kingorna ingerlaqqikkusupput.

Sisimiut TV-mi ilaasortat nuna tamakkerlugu TV maannakkut naammagiinnartariaqarallarpaat. Assiliisoq: Leiff Josefsen.

Toqqissillusi! Aningaasanik annaasaqarnavianngilasi, taamak neriorsuipput Sisimiut TV-mi siulersuisut peqatigiiffiup ilaasortaanut 300-t missaaniittunut, ilaasortat qaammammi kingullermi dekoderit pisiarisimasatik akilersimasatillu atorsinnaasimanngilaat.

TV-utileqatigiit siulersuisui sisamanngormat katersortinneqarsinnaasimapput, isumaqatigiissutigineqarporlu immikkut ittumik ataatsimeersuartoqassasoq sisamanngornermi septembarip pingajuani. Ataatsimeersuarnermi ilaasortat isummerfigissavaat peqatigiiffik ingerlaannassanersoq imaluunniit akiliisinnaajunnaarluni uniinnassanersoq. Ilaasortalli naatsorsuutit naammassineqareersimasut isummerfigisinnaassanngilaat, sulimi naatsorsuutit kukkunersiorneqarmata.

Ajunngitsumik ingerlaleraluarpoq

Kiisami peqatigiiffik ingerlallualeraluarpoq. Akiitsut 2002-meersut koruunit millionit pingasut kanalinut digitalinut akiligassat kiisami akilerneqarsimapput isumalluarnerlu malunniulluni. Sisimiuni kallerup inneranik qamittoornerup kingorna dekoderit atorsinnaajunnaarput. Tamatuma kinguninngua Palle Lennert atorfimminit tunuarpoq naatsorsuutillu tukattut qimaannarlugit.

Ilaasortat qaqugu kanalinik marlunnik amerlanerusunik isiginnaagaqaqqilersinnaanerannut apeqqutaavoq Canal Digital DK-mut akiligassat koruunit millionit affaata missaanniittut qaqugu akilerneqareersimassanersut. Napparussuarmi antenneqarfiusumi maskinat ajortissimasut iluarsaatsinneqarput ungasinngitsukkullu tikeqqinnissaat naatsorsuutigineqarpoq, kisianni taakku atorsinnaaleraluarpataluunniit, Canal Digital DK aallakaatinneqarsinnaanngilaq akiligassat akilerneqaqqaartussaammata, siulersuisuneersoq Hans Frederik Olsen oqarpoq.

Nangilluni oqarpoq, naatsorsuutit kukkunersiorneqareeriarpata, taava siulersuisut aningaasanik atorniarniarlutik misilinniarpaat akiitsut akilerneqarniassammata.

Isumalluartoqarpoq

Naak aaqqissuisoqarfimmi sapaatit akunnerani kingullermi uivertoqaraluaqisoq allaffimmi sulisoqannginnera kiisalu Palle Lennertip soraarnera pissutaallutik, taava siulersuisut sisamanngormat isumaqatigiipput ingerlaqqinniarlutik. Siulittaasuusimasoq Kristian Lyberth aamma maannakkut aningaaserisoq Hans Ole Jensen qinigassanngortittussaapput siulersuisunullu qinigassanngorteqqinniarput.

Siulersuisut tassaapput pisortaagallartup Peter Lennertip saniatigut, Marie Nielsen aamma Hans Frederik Olsen, sinniisussaallutik David Møller aamma Angerdla Mathiassen.

Powered by Labrador CMS