Kingoraartaalluni arpanneq siaasaalluni nuanisaarnertalik
Kalaallit suliffeqarfiutai Air Greenland, Grønlands Rejsebureau aamma Nunatsinni Takornariaqarnermut Inuussutissarsiuteqarnermullu Siunnersuisooqatigiit nunarsuarmi kingoraartaalluni arpannerit annersaannut DHL-staffettenimut Fælledparkenimi Københavnimi peqataapput.
Ukioq manna DHL-staffettenimut 125.000-it peqatapput peqataapput, kalaallillu suliffeqarfiutaat Københavnimiittut arpannersuarmi 40-nik peqataatitaqarput piffissaq atugaq apeqqutaatinneqarnani. Siunertaq pingaarneq tassaavoq suleqatit ikinngutillu ataatsimooqatiginissaat.
Siaasaavik angisooq Kalaallit Nunaanneersut inissisimaffiata eqqaanni inissineqarpoq, tamaanilu najuupput Air Greenlandimi, Grønlands Rejsebureaumi aamma Nunatsinni Takornariaqarnermut Inuussutissarsiuteqarnermullu Siunnersuisooqatigiinni sulisut. Peqataasut suliffeqarfinni taakkunani pingasuneersut tamarmik tujuuluaraqarput aappalaartunik, tujuuluaqqat tunuani allassimalluni »Greenlands rules again«.
– Tamatumani malunnartinniarparput uagut Kalaallit Nunaanni namminersulersimanerput, peqatasut ilaat Jesper Kunuk Egede Grønlands Rejsebureuaminngaanneersoq sermitsiaq.gl-imut oqaluttuarpoq.
Siorna allassimavoq »Greenland Rocks« siornaallu »Greenland Rules« allassimalluni.
Peqataasut tallimakkaartarput taakkulu tamarmik kilometerinik tallimanik arpattarput.
Air Greenlandip peqataatitai kalaallit suliffeqarfiutaasa akornanni sukkanerpaajupput. Taakku atorpaat 1.56,57 minutsit kilometerit tallimat tallimarialugit arpannerminni, Nunatsinni Takornariaqarnermut Inuussutissarsiuteqarnermullu Siunnersuisooqatigiit tulliupput. Taakku atorsimavaat 1.58,51 minutsit kiisalu Grønlands Rejsebureaup atorpai 2.08,35 minutsit.
– Kisianni soorlu oqaatigineqareersutut suliffeqarfimmi aallaarnertut atorparput. Kiisalu pissusissamisuuinnarpoq uagut tamatta assigiinnik tujuuluaqaratta, tassami ulluinnarni qanimut suleqatigiittuarpugut, Jesper Kunuk Egede oqarpoq.