Qeqertani umiarsuarmut pulaartitsineq

Nunaqarfiup innuttai ullaap tungaani marloriaatinngorput.

– Alliguma umiartortartunngussaanga, 11-nik ukiulik Abel Sadorana oqarpoq, umiarsuaaqqami alapernaarsuummi "Ejnar Mikkelsen"-imi aquttup issiavianut ingikkami.

Qaanaap kangiani Inglefield Bredning-ip qinnguani nunaqarfimmi Qeqertat-ni najugaqartut 25-it tamarmik arfininngormat ullaa'tungaani umiarsuaaqqami alapernaarsuummi nutaami "Ejnar Mikkelsen"-imi kaffisuupput.

Ullup ingerlanerani "Ejnar Mikkelsen"-imi inuttat 25-it tamarmik ilaasullu nunaliarput, taamaasilluni nunaqarfiup innuttai ullaap tungaani marloriaatinngorlutik.

Umiarsuit alapernaarsuutit anginerit taamaasiorneq ajortut umiarsuaaraq alapernaarsuut "Tulugaq" umiarsuaaqqallu alapernaarsuutit nutaat marluk "Ejnar Mikkelsen" aamma "Knud Rasmussen" illoqarfinnut mikisunut nunaqarfinnullu tikittarput.

– Innuttaasunit, sinerissami sulinitsinni naapittakkatsinnit tikilluaqquneqarluartarpugut, "Ejnar Mikkelsen"-ip naalgaa orlogskaptajn Hans Ole Nielsen sermitsiaq.gl-imut oqarpoq.

– Illumut iserluta kaffisoriaqqukulatittrpugut maannalu kingullermimit qujaniarluta umiarsuatsinnut nutaamut inuit kaffisoriaqqullugit qaaqquvagut.

Qeqertarmiullu aamma "Ejnar Mikkelsen"-ip naapinnerat illua'tungeriinnut annertuumik isumassarsisitsivoq. Nunaqarfimmi piniartoqarfiusumi innuttaasut umiarsuarmi nutaaliaasumi takornarniartinneqarput, elektronikkinik teknikkikkullu atortunik ulikkaavissumi, inuttallu nunaqarfimmi pisuttuarput tassani qilalukkat saarngisa aqquserngit sinaanniittut oqaluttuaralugu Kalaallit Nunaata avannaarpiarsuani inuussutissarsiornermi tunngavik pingaarnerpaaq.

Qeqertaneereerluni "Ejnar Mikkelsen" Siorapalummut ingerlaqqippoq, tassanilu sapaatiummat nunaqarfimmiut umiarsuarmut kaffisoriaqquneqarput.

Powered by Labrador CMS