Danmarkimut aallartillugit 60-ikkunni meravissianngortinneqartut 100 sinnerpaat

Kalaallit meerartaat 1960-ikkunni Danmarkimut aallartillugit meeravissianngortinneqartut qanoq amerlatiginersut ilisimaneqanngilaq. Maannakkorpiaq atuakkiortup Tine Bryldip paasiniaaffigaa taakku qasserpiaanersut, kiisalu manna tikillugu 100-t missaaniittut inuttarsisimavai.

Atuakkiortup Tine Bryldip maannakkorpiaq paasiniaaffigaa kalaallit meerartaat, qanoq amerlatigisut 1960-ikkunni meravissianngortinniarlugit Danmarkimut aallartinneqartarsimanersut, manna tikillugu 100-t missaaniittut inuttarsisimavai. Assiliisoq: Simon Hygsberg, Polfoto.

Maannakkut ukiut qulit qaangiutingajalerput Tine Bryld atuagaq ”I den bedste mening” saqqummersimmagu, siullerpaajulluni toqqortaatit misissorlugit kalaallit meerartaasa 22-t oqaluttuassartaat katersorpai, taakku 1951-imi Danmarkimut aallartinneqarput maligassiuisussatut ilinniartinneqassallutik.

Meeqqat taakku 22-t qanoq pisimanerat ulloq manna tikillugu suli oqallisaavoq, piumasarineqarluni qanorpiaq pisoqarsimaneranik misissuinissaq kiisalu immaqa Danmarkip tungaaniit pisortatigoortumik utoqqatsertoqarnissaa, knr.gl allaaserisaqarpoq.

- Atuakkap ”I den bedste mening” allareernerata kingorna kalaallinik arnanik aamma angutinik amerlasuunit saaffigineqartarpunga, taakku oqaluttuarisarpaat ukioqqortusereerlutik Danmarkimut aallartinneqarsimallutik kiisalu qallunaanut ilaqutariinnut meeravissianngortinneqarsimallutik, Tine Bryld oqaluttuarpoq.

Saaffiginnittartut amerliartuinnarnerat ilutigalugu alapernaakkiartuinnarpoq, susoqarpiarsimaneralu misissulerlugu.

- Toqqorsiviit assigiinngitsut misissuiffigisalerpakka, assorsuarlu annilaarpunga paasigakku, meeqqaat amerlasuut sisamaniit arfineq-pingasunut ukiullit, 1960-ikkunni Kalaallit Nunaanniit Danmarkimut aallartinneqarsimasut, Tine Bryld oqaluttuarpoq.

Suliarineqarsimasuni pineqartuni ilisarnaataasoq taassaavoq, meeqqat angerlarsimaffimminniit qimagutsinneqartarsimapput piitsuuneq aamma inuttut ajornartorsiornerit pissutaallutik. Siullermik taakku Kalallit Nunaanni meeqqat angerlarsimaffiannut inissinneqartarput, kisianni inissaaleqineq pissutaalluni kiisalu meeqqat ilaat ukiuni arlalinni meeqqat angerlarsimaffianniittarnerat pissutaallutik, taava isumaginninnermi oqartussaasut aalajangiisarput, meeqqat Danmarkimut meeravissiassanngortiniarlugit aallartinneqassasut.

- Uanga naliliinera tunngavigalugu, tamatuma ingerlanneqarnera assut nalaatsornerinnaasarsimavoq. Nalinginnaasumik imaattarsimavoq meeqqat ukiuni marluk pingasuni meeqqat angerlarsimaffianiittarsimapput, taava oqartoqartarsimavoq maanna takku angerlassapput, imaluunniit meeravissianngortinneqassapput, TIne Bryld oqaluttuarpoq.

Kiisalu aalajangiinernernut angajoqqaat qanoq akuutinneqartarsimatiginersut imaaliallaannaq takuneqarsinnaanngilaq.

Powered by Labrador CMS