Skip to main content

Jesper Langballe Pituffimmi orluvoq

Dansk Folkepartimi ilaasortap assai illuttut qipseqarput.

Amerikamiut niuertarfiata BX (Base Exchange) Pituffimmiittup najuartarfiatigut orlunermi kingorna, palasi folketingimilu ilaasortaq Jesper Langballe, Dansk Folkepartimeersoq assammigut illuttut gipseqarpoq.

Jesper Langballep 70-inik ukioqalernissami aqaguani aggustip 31-ani talerpimmini qiterlini napivaa gipsilersillugulu.

Folketingimi Kalaallit Nunaannut ataatsimiititaliaq ulluni makkunani nunatsinnik kaajallaalluni angalavoq. Angalaneq sapaatip akunnera qiteqquttoq Pituffimmi aallarnerpoq, kujammut sinersisserluni alapernaarsuut »Hvidbjørnen« angallatigalugu.

Jesper Langballe sisamanngornermi amerikamiut pisinniarfiat BX pisiniarfigaa. Ajoraluartumilli majuartarfinni orluvoq. Assani talerpik gipseqarmat folketingimut ilaasortap orlulerami saamimminik annanniaraluarpoq, pisiniarfiulli natianut orlugami, paffini saamerleq napillugu.

JyllandsPostenip nittartakkakkut aviisia jp.dk, folketingimi ilaasortap erneranik palasi Christian Langballemik oqaloqateqarsimasoq allappoq.

Pituffiup nakorsaata taleq saamerleq gipserpaa. Assani illuttut gipsileqalermata Jesper Langballep Kalaallit Nunaanni angalaarnini kipiinnarpaa.

Amerikamiut timmisartuat Hercules atorlugu Kangerlussuarmut timmisartuunneqarpoq, Air Greenlandip nalinginnaasumit angallassinerani Norsamut ilaalluni Kastrupiliarluni.

Jesper Langballe jp.dk-imut oqarpoq Kalaallit Nunaannut tikeraarnini nuannaarutigalugu naak, sivikikkaluartoq. Oqallinnernik allakkumatuup ajornartorsiutaasa annerpaartarilerpaa, assani illuttut gipseqarnerisa nalaanni "allaffissiap saavani atorfissaqarpallaannginnini".

Grønlandsudvalgip ilaasortaasa sinneri arfininngornermi ullup qeqqa Upernaviup eqqaani »Hvidbjørnen« angallatigalugu kujammukaartut Kangilinnguaniit sermitsiaq.gl-imut paasissutissiipput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER