Qaqortumi kapisillit misissorpaat
Patrick Gargan Central Fisheries Board, Irlandimi angerlarsimaffilik Qaqortumi kalaalimineerniarfimmut alakkaasaqattaarpoq, iIlloqarfimmi aalisartut suleqatigalugit Qaqortup eqqaani kapisillit pisat misissoramigit.
Kapisilinnik misissuineq ullut 16-it kingulliit ingerlasoq ilisimatusarnikkut misissuinerup annertuup ilagaa, kapisilinnik misissuineq EU-mit aningaasaliiffigineqarpoq nunat avannarliit killiit kapisilinniartarnermut suleqatigiiffiat NASCO aammalu Kalaallit Nunaanni Pinngortitaleriffik suleqatigiillutik suliaat. Misissuinermi siunertarineqarpoq paasissallugu, sooq atlantikumi avannarlermi kapisillit ikileriarsimanersut.
Aalisakkat oqimaalutarneqarput qanorlu takitiginersut uutorneqarlutik aamma qitianni avaleraaqqat qiorneqartarput DNA-vi misissorlugit suminngaanneernersut paasiniarneqassammata.
Kalaallit Nunaanni kapisillinnit pisarineqartartunit 30 tonsinit 40 procentii Europap avannaani kuunneersuupput sinnerilu 60 procentit USA-mit Canadamillu takkuttarput. Kapisillit ikittuinnaat inuit suffisarfiliaanneersuupput.
Kapisillit anginerit nalinginnaasumik ukiut 3-4 imaaniinnikut Kalaallit Nunaannut pisarput, kapisillit mikisut Savalimmiut Islandillu eqqaanniinnerusarlutik.
Ukioq manna Qaqortumi kapisillit 235-t misissorneqarput taakkunannga kapisillit 120-t pisiarineqarput iloqutaat misissorniarlugit. Kapisillit misissorneqareersut Napparsimavimmut Utoqqaallu illuannut tunissutigineqarput.
Nunatsinni illoqarfiit allat aamma misissuiffigineqassapput.