Nalunaaqutsersuineq naammassivoq
Narsap Qassiarsuullu akornanni pisuttut aqqutaata inussunnik nalunaaqutsersornera naammassivoq.
Narsamiit Qassiarsuup tungaanut pisummik angalanermi aqqut maannakkut nalunaaqutsersimaneqalerpoq, Kommune Kujallermi inuussutissarsiornermut siunnersorti Grethe H. Nielsen ilisimatitsivoq.
Sapaatip akunnera qaangiuppoq Qaqortumiit Igalikup tungaanut aqqutaani inussuliorneq naammassillugu piareermat taavalu sapaatip akunnerata tulliani Qassiarsummiit Narsap tungaanut aqqut inussuliorfigineqarnera piareerluni.
Qassiarsummiit Narsap tungaanut aqqut illoqarfimmi pitsaaliuinermik suliaqartuusoq Bolethe Stenskov siuttoralugu ingerlanneqarsimavoq, suliffissaaleqisut taavalu takornarianik pisummik angalatitsinermi ataatsimiititaliamit marlunnik holdeqarlutik sulisoralugit.
Suleqatigiit ilagisimavaat Rama Knight tuluusoq assiliillaqqissoq, kajumissutsiminik ilaasoq, pisummik angalanermi aqqutaa pillugu kingusinnerusukkut assitalinnik atuakkiorniartoq.
Tallimanngormat unnukkut suleqatigiit qaqqamiit aterput, ataasinngormalu Narsami kommunip allaffiani inuussutissarsiornermi ataatsimiititaliap siulittaasuanit Kalistat Lundimit borgmesterillu tullersortaanit Kiista P. Isaksenimit tikilluaqquneqarput.