Sisimiuni nerisassanik eqqaanerujussuaq
Nerisassanik eqqaasorujussuuvugut. Eqqarsarluarnerullutalu pisiniartaraluarutta containerit quliugaangata pingasut Aalborg umiarsualivianiiginnartassagaluarput, tamanna Sisimiuni misissuisoqarneratigut erserpoq.
Sisimiuni iginneqartartut 35 procentii tassaapput nerisassat. Naatitat, neqit nerisassiarineqanngitsut, paarnat iffiallu. Taakkulu 10 procentiinnaat tassaapput tuttut sinnikui allallu nammineq pisat.
Misissuinermi aqutsisuuvoq ARTEK-imi civilingenørinngorniarluni ilinniartoq Rasmus Eisted, saniatigut Avatangiisit sammillugit Ph.d-ngorniarluni ilinniartoq. Misissuinermi suleqatigai DTU-mi ilinniartut qulit.
Misissuinerit massakkumut inernerisa takutippaa eqqarsarluarnerulluta pisiniartaraluarutta containerit quliugaangata pingasut Aalborgip umiarsualivianiiginnartassagaluartut.
Sapaatip akunnera naappat eqqakkat nalunaarsorneqarlutillu allaaserineqassapput, Rasmus Eistedillu eqqoqqissaartumik ilisimalissavaa sisimiormiut sunik eqqaavissuarmut eqqaasarnersut, pappialanik, plasticinik il.il. qanoq amerlatigisunik. Taavalu nunanut allanut sanilliussisinnaalerlunilu eqikkaalluni naliliisinnaalissaaq.
Sammisaq pillugu Sermitsiaq normu 33. atuaruk.