Julie WWF-ambassadørinngussaaq
Erinarsortartoq Julie Berthelsen aamma inuit qanoq atisalersortarnissaannik siunnersuisartoq, atuakkiortoq aamma inuit atissalersorsimanerannik aviisini uparuartuisartoq Jim Lyngvild ullumi pisortatigoortumik WWF-imi ambassadørinngussapput.
Annonse
Ullumi fynimiut marluk Jim Lyngvild aamma Julie Berthelsen WWF Verdensnaturfondenimi ambassadøritut toqqarneqassapput, fyens.dk allaaserisaqarpoq.
Toqqaaneq pissaaq københavnimi ECCO Walkathonimut atatillugu, ilaatigut Kalaallit Nunaanni nannut piujuaannartinneqarnissaannut aningaasanik pissarsiffiusartoq.
Taakku ambassadørit marluk tamarmik Kalaallit Nunaanneeqqammerput, taamaanilu nannunut aningaasat siulliit pissarsiaraat.
Ilaatigut WWF-imit sulissutigineqarpoq Issittumi pinngortitap pissarititaasa annertoqisut piujuaannartinneqarnissaat aamma periarfissarsiuinissaq, inuit aamma uumasut sumiiffinni tamaani pitsaanerusumik naleqqussarsinnaanissaat silaannaap allanngoriartornerata kingunerisai eqqarsaatigalugit.