Qaarsuarsuup matuneqarnissaa pilersaarutigineqanngilaq

Angallannermut naalakkersuisup ilumuunnginnerarpaa Naalakkersuisut pilersaarutigigaat Uummannap eqqaani Qaarsuarsunni mittarfiup matuneqarnissaa.

Timmisartuussisartumik ataatsimik sullissinermi isumaqatigiissuteqarnissaq Naalakkersuisut isumaliutigaat, Jens B. Frederiksen oqarpoq.

Taamatut naalakkersuisunut ilaasortaq allappoq inatsisartunut ilaasortamut Doris Jakobsenimut akissummini, taamatut allappoq ag.gl.

- Kisiannili soorunami aningaarsartuutit isiginiarneqassapput, Naalakkersuisut angallannerup aaqqissuussaanera nutaaq aalajangersarpassuk, Jens B. Frederiksen oqarpoq.

Jens B. Frederiksenip erseqqissarpaa Naalakkersuisut aamma landskarsip inissisimanera arajutsisaakkaat kissaatigalugulu innuttaasut aningaasatigut atugassanit killilinnit sapinngisamik annertunerpaamik angalasinnaanissaat.

Tassa imaappoq, Kalaallit Nunaanni angallannermut tapiissutit atugassiissutigineqartut iliuanniissapput, Jens B. Frederiksen oqarpoq.

Ullumikkut Kalaallit Nunaanni 59-inik mittarfeqarpoq - illoqarfinni helistop-iniit mittarfeqarfissuarnut. Timmisartuussiviit timmisartorfinnut arlalissuarnut agguataarsimapput timmisartuussinermik ingerlatsisunut assigiinngitsunut agguataarsimasunut.

- Naalakkersuisut timmisartuussinermik ingerlatsisumik ataatsimik ataatsimut sullissinermik isumaqatigiissummik isumaqatigiissuteqarnissamik periarfissat misissorusuppaat, nunap immikkoortuinut 12-inut agguataarsimasumik sullissinermut isumaqatigiissuteqarneq pinnagu, kalaallinut inuiaqatigiinnut aningaasatigut iluaqutissaqarnerpaamik isumaqatigiissuteqarnissaq qulakkeerniarlugu, Jens B. Frederiksen oqarpoq.

- Misissuinermi ilanngunneqassaaq sumiifiit ilaanni helikopterimik timmisartuussisarnissaq siunertaqarnerussanersoq.

Powered by Labrador CMS