Naalungiarsunnut angerlarsimaffimmik neqerooruteqarniarpoq

Kommuneqarfik Sermersuup isumaliutigaa naalungiarsunnut angajoqqaanngorlaanullu atugarliortunut ulloq unnuarlu angerlarsimaffimmik pilersitsinissaq.

Angajoqqaanngorlaat amerligaluttuinnartut maannakkorpiaq ikiorneqarnissaminnik pisariaqartitsisut kommunimut saaffiginnittarput. Ass.: Polfoto/Camilla Stephan

Kommuneqarfik Sermersuup isumaliutigaa naalungiarsunnut, ilaatigut annertuumik sumiginnaasunik, tarnimikkut nappaatilinnik imaluunniit imigassamik atornerluisorujussuarnik angajoqqaalinnut immikkut ittumik angerlarsimaffimmik pilersitsinissani. Taamatut allappoq sermersooq.gl.

Taamatut suliniuteqartoqarnialerpoq kommunip paasimmagu tupaallannartumik naartusut angajoqqaanngorlaallu amerlasuut naalungiarsuutillit angerlarsimaffeqanngitsut, aalajangersimasumik aningaasarsiaqanngitsut ilinniagaqanngitsuusullu. Tamakkua sakkortuumik meeraasimapput imigassaq nakuusernerlu misigisarsimallugit, tamannalu angajoqqaajusinnaanerannut sunniussinnaavoq.

Paaqqinnittarfik nutaaq taamaattoq 46 millioner koruuninik akeqassaaq. Sanaartornissamut pilersaarutit namminersornermut ingerlateqqinneqarsimavoq, namminersorneq aningaasanut inatsimmut atatillugu sanaartornermut 50 procentimik tapiissuteqarsinnaammat.

Ilaqutariinnut atugarissaarnermullu ingerlatsiviup ukiut marlussuit matuma siornatigut inuusuttut naartusut immikkut pisariaqartitsisut sammilersimavai.

Meeqqanut ilaqutariinnullu immikkoortoqarfimmi pisortaq naapertorlugu saaffiginninnerit amerleriarujussuarsimapput, Nuup Kommunerisimasaata naartusut angajoqqaanngorlaallu tamakkua sammilermagilli.

- Saaffiginnittarput maannakkorpiaq ikiorneqarnissaminnik pisariaqartitsigamik. Immaqa angajoqqaaminnit anisitaasimapput unnuakkullu barnevognilerlutik angalaaginnartarlutik. Taamaattumik unnuiffissaminnik maannakkorpiaq pisariaqartitsiarput, Dora Kleist oqarpoq.

Powered by Labrador CMS