Nappaatipilunnik ilisimatusarnermut millionillit
Nakorsap Gert Mulvadip nunani tamalaani ilisimatuut peqatigalugit Kalaallit Nunaanni nappaatit atoqatigiinnikkut tunillaattartut misissuiffigissavai.
Amerikarmiut ilisimatusarnermut aningaasaateqarfiat National Science Foundation ilisimatusarnermik suliniummut, Kalaallit Nunaanni atoqatigiinnikkut nappaatinik, soorlu klamydiamik gonorrhea-millu tunillatsissimasunik ikilisitsisussamut, $ 959.000-inik (5,2 millioner koruunit missaannik) tunissuteqarsimavoq.
Suliniut ukiuni pingasuni ingerlanneqassaaq, samminiarneqarpullu 15-iniit 19-inut ukiullit angajoqqaavilu. Kalaallit Nunaat ilisimatuunut soqutiginaateqarpoq, pissutigalugu assersuutigalugu klamydiamik tunilatsittartut Danmarkiminngaannik quleriaammik amerlanerusarmata.
Tunillatsittartut taama amerlatiginerannut immaqa pissutaavoq Kalaallit Nunaanni atoqatigiinneq paquminartinneqarmat, ilisimatuut siunnersuipput.
– Atoqatigiinneq oqaloqatigiissutigissallugu kanngunartorujussuusinnaavoq, angajoqqaanit tamanna sungiusimanngikkaanni. Immaqa atoqatigiinnermik oqaloqatigiinnermut ileqqut pisooqataapput Kalaallit Nunaanni takusatsinnut (tunillatsittartut amerlaqisut, aaqqiss.), peqqissutsimut ilisimatooq Elizabeth Rink, Montana State University-meersoq oqarpoq.
Taanna suliniummi peqataavoq nunatsinni nakorsaqarfimmi nakorsaaneq ilisimatoorlu Gert Mulvad peqatigalugu. Tamatuma saniatigut suliniummi peqataapput Ruth Montgomery, Ilisimatusarfimmi nakorsaatinut antropoligi-m ph.d-tut ilinniagaqartoq, nakorsat Anders Koch aamma Jørgen Skov Jensen, Danmarkimi Statens Serum Institutimeersut, kiisalu Dionne Gesink Law, University of Torontomi the Scool of Public Health Sciendes-imi professori, tamanna atuarneqarsinnaavoq www.montana.edu-mi.