Brintimik tunisassiulissaaq
Nukissiorfiit ukioq manna erngup nukinga atorlugu brintimik tunisassiulerniarpoq.
Ukioq manna nunatsinni nukissamik pilersuiffik Nukissiorfiit brintimik tunisassiuleriissaaq. Taamatut paasissutissiivoq DR-imi P!-imi aallakaatitassiaq "Miljøreportagen".
Brintimik tunisassiorneq nerriveeqqami solcellenik qullermillu ingerlanneqartumi ingerlanneqarallarpoq. Periuseq taanna takutinneqarpoq ukioq manna juunip 20-ianni Nuummi inuussutissarsiutinik takutitsinermi Greenland EXPO-mi Nukissiorfiit peqataammat.
Nukissiorfiit sermitsiaq.gl-imut oqarpoq selskabip kissaatigigaa Nuup kujataani Utoqqarmiut Kangerluarsunnguanni erngup nukinganik nukissiorfiup nukissiaata atorneqanngitsup brintimik tunisassiornermut atornissaata misilinnissaa.
Brintiliorfiup ingerlatsivik misilittagaqartilissavaa brintimik tunisassiornermik aammalu brintimik nukissamik ingerlatsisutut atuinermik. Brintiliorfik aamma takussutissiissutitut atorneqassaaq, innuttaasut brintimik ikummatissanullu cellenik ilisimasaqarnerulernissaannut, Nukissiorfiit paasissutissiivoq.
Takussutissiorfik imaqassaaq elektrolysenalægimik, brintimut toqqorsivimmik aamma ikummatissanut celleqarfimmik.
Brintiliorfik angallattagaassaaq taamaasillunilu containerimiitinneqassalluni.
Nukissiorfiit naatsorsuutigaa brintiliorfik Nuummiilissasoq 2009-p naannginnerani.
Nukissiorfiit brinti pillugu filmeeraliorsimavoq, taannalu downloadersinnaavat uani.
Filmeeraliaq "Brint – Fremtidens energi" savalimmiuyni Jardfeingi, Ilinniusiorfik Nukissiorfillu suleqatigiinnerisigut sananeqarsimavoq.