Skip to main content

Ajuusarput aalajangiussimavaalli

Timmisartumi saqisut isumaqarput Air Greenlandip pisortaasa suliumajunnaartoqarnissaa aalajangiussimagaat. Ataatsimiittoqarnissaanik suli isumaqatigiittoqanngilaq.

Sapaatiummat ilisimatitsilluni ataatsimiittoqareernerata kingorna timmisartuni saqisut Air Greenlandilu isumaqatigiinnginnerminni isumartik aalajangiusimavaat. Air Greenland Cabin Union, ACU-mi, siulittaasoq Anders Mark Jensen nalunaarpoq

– Ilaasortatta nalunaarutigaat aalajangiussisimallutik. Ajuusaarutigaat uagut tamaanga killissimagatta, isumaqarpulli tamanna namminneq pisuussutiginagu. Tassami aaqqiagiinngittoqartillugu illuatungeriittoqartuannaarpoq, Anders Mark Jensen sermitsiaq.gl-imut oqarpoq.

ACUp siulittaasuata maluginiarpaa tuniniaanermut aamma nittarsaassinermut pisortaq Radioaviisimi oqarnera. Arfininngormat tassani Christian Keldsen oqarpoq »uagut nalunngilarput suliumajunnaartoqassasoq «. Tamanna timmisartuni saqisut imatut paasivaat pisortat suliumajunnaartoqarnissaa toqqarsimagaat.

– Kjeldsenip KNR-imi nalunaarnera paatsuugassaanngilaq, sulimajunnaartoqarnissaalu aalajangiussimagunarluinnarpaat, Anders Mark Jensen oqarpoq.

– Ilissi isumaqatigiinniaqqinnissaq suli soqutigaasiuk?

– Soorunami. Uagut isumaqatigiinniarnissaq naaggaarsimanngisaannarparput. Sulisartut kattuffiini isumaqatigiinniartartut oqaloqatigiinnissamut piareersimajuaannarput, Anders Mark Jensen oqarpoq.

– Qanoq sivisutigisumik suliumajunnaarsinnaavisi?

– Tassani sivisussuseq apeqqutaanngilaq. Uagut ilaasortatta uagutsinnut nalunaarutigaat alloriarnerit suut taamaasa piareersimaffigalugit, ACU-mi siulittaasoq oqarpoq.

– Ilissi akerleralusi Facebookimi gruppeliortoqarsimavoq aamma Kalaallit Nunaanni Sulisitsisut Peqatigiiffianit oqaatigineqarpoq, ilissi inuiaqatigiit eqqarsaatigisariaqarisi. Illit taakku qanoq oqaaseqarfiginiarpigit?

– Ilaasussanut ilungersunartorsiortunut tunngatillugu taamatut pineq nalinginnaasumik qisuariarneruvoq. Soorunami tamanna assut ajuusaarnarpoq. Kisianni aaqqiagiinnginnermi illuatungeriittoqartuaannarpoq. Kalaallit Nunaanni Sulisitsisut Peqatigiiffiannut tunngatillugu tamanna ilaasortassarsiornertut isikkoqarpoq. Tamanna eqqumiilaarpoq, Anders Mark Jensen oqarpoq, erseqqissarlugulu Air Greenland Kalaallit Nunaanni Sulisitsisut Peqatigiiffianut ilaasortaanngimmat.

– Illit isummat malillugu naapeqqinnissarsi periarfissaava?

– Uagut oqaatigiuaannarparput oqaloqatigiinnissamut qaquguluunniit naaggaarnaviarnata.

– Air Greenlandip pisortai taakkuussappat ilissinnut attaviginnittut?

– Uanga tamanna oqaaseqarfigissanngilara.

– Ilissi nammineq taamaaliorniarpisi?

– Uanga tamanna oqaaseqarfigissanngilara.

– Taava qanoq ililluni oqaloqatigiinneq aallartissava?

– Uanga tamanna maannakkut oqaaseqarfigisinnaangikkallarpara, Anders Mark Jensen oqarpoq uppernarsarlugulu, manna tikillugu suli illuatungeriit naapinnissamik isumaqatigiissuteqarsimanngitsut.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER