Pisiniarfiit suliumajunnaarnissamut eqqanaarsarput
Pisiffik nioqqutissanik tonsinik sisamanik immikkut inniminniisimavoq, taakkulu ulluni aggersuni Nunatsinnut timmisartuuneqassapput.
Timmisartuussinermi suliumajunnaartoqarsinnaaneranik ilimasunneq pissutaalluni pisiniarfiutillit marluk angisuut immikkut ittumik nioqqutissanik pisiniarsimapput, taamaaliornermikkut neriuutigaat, suliumajunnaartoqannginnerani sisamanngorpat aallartissagunartumi, illoqarfinni nioqqutissanik nutaanik peqarnissartik, knr.gl ilanngutassiivoq.
Pisiffimmi tuniniaanermut aamma pisiniarnermut pisortaq Per Steen Larsen oqaluttuarpoq Pisiffik immikkut ittumik nioqqutissanik tonsinik sisamanik inniminniisimasoq, taakkulu timmisartukkut ulluni tulliuttuni tikisinneqassasut.
- Uagutsinnut tunniunneqarsinnaasut tamakkerlugit inniminnersimavagut, soorlu qallersuutissat, immuleriffinni tunisassiat aamma naatsitat kusanarnerit. Immikkut ittumik tonsit sisamat, uagullu naatsorsuutigaarput tamakku illoqarfinnut Pisiffeqarfiusunut suliumajunnaarnerup aallartinnginnerani apuussinnaassasut, Per Steen Larsen oqarpoq.
Brugsenip HR-chefia, Carsten Olsen, oqaluttuarpoq Brugsen immikkut ittumik qallersuutissanik aamma naatitanik pisiniarsimasoq, tamakkulu pingasunngorpat apuunnissaat naatsorsuutigineqarpoq.
- Kisianni uagut neqeroorutinik assigiinngitsunik piseqqusaarutigut sapaatit akunnerini aggersuni pisussani nioqqutissat umiarsuakkut tikittartut tunngavigineruvagut, tassa aaqqiagiinnginneq sivitsoruttuussanngippat taava Brugsenimi pisisartutta suliumajunnaartoqassagaluarpat tamanna maluginavianngilaat, Carsten Olsen eqqissisaavoq.