Statoil Nunani Avannarlerni suliffeqqarfissuit annersaraat
Aningaasarsiornermut atuagassiap Fortune-p nunarsuarmi ingerlatsivinnut 500-nut allattorsimaffiani StatoilHydro nr. 36-iuvoq. A.P. Møller-Mærsk allattorsimaffimmi nr. 106-iuvoq.
Amerikarmiut aningaasarsiornermut atugassiaata Fortune-p nunarsuarmi suliffeqarfissut annersaannut 500-nut allattorsimaffiani norskit uuliasioqatigiiffissuat StatoilHydro nr. 36-imut qaffariarsimavoq.
StatoilHydro Kalaallit Nunaanni uuliamik ujaasinerni arlalinni peqataasarsimavoq, kingullermik aasaru Tunup avannaani peqataassalluni, tamanna uuliqarferujussuartut ilimagineqarluni.
Allattorsimaffimmi qanoq inissinneqarnisssamut ingerlatsiviup kaaviiaartitai apeqqutaatinneqartarput, nunarsuarmilu aningaasarsiornikkut ajornartorsiortoqaraluartoq StatoilHydro siorna nr. 59-imiit annertuumik qaffariarsimavoq.
2008-mi 29.500-nik sulisoqarluni 116,2 milliarder dollarsinillu kaaviiaartitaqarluni StatoilHydro maanna Skandinaviami ingerlatsiviit annersarilerpaat, taamatut allappoq E24.no.
Siorna uuliap akiata qaffasinnerujussuat pissutigalugu Fortunep allattorsimaffiutaani siuttuni aamma nikittoqarsimavoq.
Royal Dutch Shell suliffeqarfissuarni annersaavoq 102.000-nik sulisoqarluni 358,3 milliarder dollarsinillu kaaviiaartitaqarluni, tullersortaalluni unammillertaa Exxon Mobil.
Nr. 3-mut appariarsimavoq siorna siuttuusimasoq, niuertarfiutileqatigiiffissuaq Wal-Mart, taannalu sulisut amerlassusaat eqqarsaatigalugu uuliasioqatigiiffinnit suli anneruvoq, tassa Wal-Mart6 2,1 millioninik sulisoqarmat.
Qallunaat suliffeqarfissuat A.P. Møller-Mærsk, 62,6 milliarder dollarsinik kaaviiaartitaqarluni nunarsuarmi selskabit annersaannut allattorsimaffimmi 106-imut qaffariarsimavoq, siorna nr. 131-iusimalluni.