Aarluk marlunnik oqaqarluni pivoq
Ilisimatusarluni suliami nutaami paasineqarpoq aarluup qarlornerata nipaa angallatinik qanittumiittoqaraangat allanngortartoq.
Aarluit attaveqatigiittarnerminni nipimik qataassusiat allanngortissimavaat, tamatumunngalu pissutaavoq sumiittarfianni umiarsuit angalasut amerlinerat, sikunews.com allappoq aamma Islandip Radioa aamma TV-ia, ruv.is, issuaaffigalugit.
Ilisimatusarneq tunngavigalugu misissueqatigiit Islandimeersut, Skotlandimeersut aamma Japanimeersut maannakkorpiaq Vestmannap qeqertaasa eqqaanni aarlunnik misissuissut, misissuinerisa inernerisa tamanna paasinarsisippaat.
Ilisimatusarneq tunngavigalugu misissuineq siorna aallartinneqarpoq, taamani aarluit qarlornerminni nipaat qataatsuararsuit immiunneqarput.
Ilisimatusartut siorna paasivaat aarluit qarlornerminni nipaat 40 kilohertz angullugu nipitussuseqartoq, naak inuit nipi tusaasinnaasaat taamaallaat 20 kilohertz tikillugu qataassuseqaraluartoq.