Umiarsuup naalagaa akiliisitaasoq
Sinerissami alapernaarsuutip »Ejnar Mikkelsen«-ip kilisaammik Hakimik misissuitilluni aalisarnermut inatsimmik unioqqutitsisoqarnera paasivaa.
Hakimi naalagaasoq nassuerpoq saarullinnik saniatigut pisarisimasani uuttortaqqaarnagit qanorlu pitsaassuseqarneri nalunaarsoqqaarnagit avammut igissimallugit, taamatut allaaserisaqarpoq forsvaret.dk.
Kilisaatip naalagaata aamma saniatigut pisat, saarulliit, mikinerpaaffissanik minnerusut allanit aalisakkanit immikkoortillugit nalunaarsornissaat kiisalu aalisakkat suuneri immikkoortiterlugit pitsaassusiisa pisallu tigummiinnakkat nalunaarsornissaat pinngitsoorsimavaat.
Suliaq tamanna pingasunngornermi 22. Juuli aalajangiiffigineqarpoq, kilisaatip naalagaata eqqartuussivikkoortitsinngitsumik aalajangiineq akuersaarmagu 40.000 koruuninik akiligassinneqarluni.
Kilisaataatileqatigiit pingasut kilisaat Haki pigaat. Kilisaataatileqatigiit avataani saarullittassat tamakkiisut 51 procentiinik pisassaaraat.
Kilisaataatileqatigiit tassaapput Arctic Prime Fisheries, kiisalu kilisaataatileqatigiit nutaajunerusut Tunumi Tsuuddii aamma North Greenland Seafood.
Pisortaq Kim Høegh-Dam Arctic Prime Fisheriesimeersoq saarullitassinneqarnermut atatillugu februaarimi Sermitsiamut oqarpoq qaammatini kingullerni saarulliit 50 procentimik akikinnerulersimasut. Taamaattumillu annertuumik pisassinneqarnissaq pisariaqartoq.