Kalaallit erinniarsuarnik tusarnaartitserngaalersput
Kalaallini operamik erinarsortartut Ida Heinrich operamillu erinarsortartutut ilinniartoq Josef Lund Josefsen siullerpaamik ataatsimoorlutik tusarnaartitsilerput Katuami sapaammi aggustip 9-anni.
Tusarnaartitsinermi erinnat nuannarineqarluartut kalaallisuut allamiutuullu killitsinnaqisut atorneqassaput. Tulleeriillutillu erinarsortassapput nuannivissunik.
Ida Heinrich (inuusoq 1979) aamma Josef Lund Josefsen (inuusoq 1980) Nuummi inunngorput tassanilu peroriartorlutik. Inuusuttuaraanerminniit ikinngutigiipput tamarmillu meeraanerminniillu erinarsornermik soqutigisaqartuullutik.
Ida 2000-imi Josefilu 2002-mi "Söngskolinn Í Reykjavik" Island-imiittumi atualerput, Ida 2006-imi naammassivoq, Josefillu atuarnini 2010-mi naammassissavaa.
Marluullutik immikkut tusarnaartitsiartoqattaarnermik ingerlatsinikuupput, Ida 2006-imi illoqarfiit sisamat tikippai tassani København ilaalluni. Josef 2009-mi illoqarfinni arfineq-marluusuni tusarnaartitseqattaarpoq tassani aamma København ilaalluni.
Ida Josefilu siullermeerlutik erinarsoqatigiipput Sisimiuni kulturikkut Illorsuup Taseraliup ammaanersiorneqarnerani 2008-mi. 2009-p aasaanerani assigiinngitsuni erinarsoriaqattaarput soorlu inuiattut ullorsiornermi Namminersorneq eqqunnersiorlugu Katuami nerersuarnermi, Qeqqani ilinniarnertuunngortunut, Qeqqata erinarsoqatigiissui peqatigalugit kiisalu Kalaallit Nunaata islandillu assammik arsartartuisa unammilerneranni nunat taakku inuiattut erinarsuutaat atoramikkik.
Aasaanerani juulimi meeqqat atuanngiffeqarneranni meeqqanik erinarsornermik, pattannermik, nuutilerinermillu ilinniartitsipput.
Tusarnaartitsinermi ingiortigissavaat noqartilissortartoq Jim Milne.