Lars-Emil timmisartumik attartorpoq
Inatsisartunut ilaasortaasimasoq, Folketingemut ilaasortaq Lars-Emil Johansen timmisartoq namminersortup pia attartoramiuk akileraartartunut 31.325 koruunit akiligassanngortikkamigit utoqqatserpoq
Timmisartumi inissaarukkaanni qanoq iliortoqartarpa? Timmisartumik namminersortumit pigineqartumik attartuinnartoqartarpoq.
Nunatsinni erniulluartup Lars-Emil Johansenip nalunaaqquttap ataatsip iluani akileraarutit 31.325 koruunit atorpai Nuummit Kangerlussuarmut timmisartumik namminersortumit pigineqartumik attartornermini.
Tamanna Lars-Emil Johansenip ilassinninnermut aningaasartuutaasa takussutissartaanni takuneqarsinnaasut, ekstrabladet.dk allappoq.
Lars-Emil Johansen timmisartuni nalinginnaasuni Nuummiit angalasuni inissaqarsimanngilaq maajip 15-iani 2007, USA-mut timmisartuussisoqartalernissaq pillugu ataatsimiigiarniarluni. Kalaallit Nunaata naalakkersuisuisa siulittaasorisimasaat ilaaffissaarukkami Air Greenland aqqutigalugu timmisartoq King-Air attartorniarlugu aalajangeriataarpoq.
Timmisartoq namminersortumit pigineqartoq utoqqatsissutigaa.
Lars-Emil Johansenip sipaanngilluinnarluni angalarusussuseqarsimanini ajuusaarutigaa.
- Taamatut aalajangersimanera tulluussimaarutiginngilara. Timmisartumut nalinginnaasumut inissaqannginnama naliliivugut ataatsimiinnissaq Kalaallit Nunaata niueqateqarnissaanut pingaaruteqartorujussuusoq, Lars-Emil Johansen Ekstra Blademut oqarpoq.
Kalaallit Nunaanni politikkerit piisaapilunnerannik ajornartorsiuteqartoqarpoq, aviisip AG-ip akileraarutinik atornerluinermi saqqummiussuinerani takuneqarsinnaavoq.
Aatsaat taamaasiulinngilaq
Lars-Emil Johansen nassuerpoq aatsaat siullermeerluni timmisartumik namminersortumit pigineqartumik attartorani.
- Ilumoorpoq siornatigut timmisartumik allamik attartornikuusunga. Kalaallit Nunaanni angalaniarneq imaannaanngilaq.
- Tamatumuuna timmisartoq napparsimasunik paarsisoq suliaminut atatillugu angalasoq peqatigalugu attartorpara. Imaanngilaq kakkanniaannarlunga taamaaliortunga, Lars-Emil Joahnsen oqarpoq.