Puisit pillugit Danmark isornartorsiorneqarpoq

Danmarkip Rumæniallu EU-p puisit amiisa tuniniaqqusaajunnaarnerannut akuersaaqataannginnerat uumasunik illersuiniaqatigiit iluarinngeqaat.

Danmark Kalaallit Nunaallu ajorsartinneqarput EU-mi nunanut allanut ministerit puisinit tunisassiat tuniniaqqusaajunnaarnissaat ataasinngornermi akuersissutigimmassuk. Danmarkip taaseqataannginnera uumasunik illersuiniaqatigiit suliniaqatigiiffiata International Fund for Animal Welfare (IFAW) assorsuaq iluarinngilaat.

- EU-p nunarsuarmi aqutsisut ileqqorissaarumasut akornanni inissisimaannarnissaq pingaartikkaat, Danmarkip Rumæniallu tusaamalluarneqarnertik aningaasarsiorusuinnarlutik immerutigaat, Lesley O’Donnell, IFAW-ip EU-mi pisortaa oqarpoq, nunat taakku marluk EU-p aalajangiineranut taaseqataarusunnginnerat paasinarsimmat.

- Erseqqilluinnarpoq aningaasanik isaatitsisinnaaneq uumasut qanoq atugaqarnissaanniit pingaartinneqarnerujussuusoq.

IFAW naapertorlugu inuit 1,2 millionit suliniaqatigiiffik tapersersorpaat. Suliniaqatigiiffik Canadami puisinniartarnermik akerliunermit aallartittoq maanna nunarsuaq tamakkerlugu suliniuteqartarpoq. Uumasunik illersuiniaqatigiiffik taanna ukiorpassuarni EU-p puisinniarnermik akerliulernissaa anguniarlugu suliniuteqarpoq.

Naak, "inuit" immikkut pineqarnissaat anguneqarnikuugaluartoq Ritzau naapertorlugu kalaallit pisortaasa annilaangatigaat Kalaallit Nunaanni nunaqarfiit arlallit napaniutaat aserorluinnarneqassasoq

Powered by Labrador CMS