Aviisi oqorsaatitut
CO2, seqerngup periarfissiinera, erngup nukingata atorneqarnera kiisalu kalaallit marraat. Slotspladsenimi Tivolimi Climate Greenlandimit klima qitiutinneqarpoq.
Climate Greenland decembarimi 2009 Københavnimi silaannaap allanngoriartornera pillugu ataatsimeersuarnissamut Slotspladsenimi piareersarpoq.
Tamanna ingerlanneqarpoq tupermi tallimanngorneq naallugu seqinermik kissatsinneqarsimavoq, taamaattumik toqqup iluani kiassuseq soorlu nunani kiattuni kiattarnera.
Saqqummersitsivik ornigarneqarluartoq, tassanilu takutinneqarput Kalaallit Nunaanni CO2-mik aniatitsinerup annikillinissaanut iliuusissat kiisalu silaannaap allanngoriartornera. Ilaatigut ikkunneqarsimavoq seqerngup qinngornerinik katersuisartoq mikisunnguaq, sananeqarsimalluni atorneqarsinnaasoq tamaani puttussimasoq takussaavoq.
Tassa ilaatigut taassuma serngup qinngornerinik katersuisartup Sisimiuni Center for Arktisk Teknologimi, periutsit atorlugit sananeqarsimasoq atorsinnaasorlu ualip ignerlanerani imeq qummuattamiittoq kissatsissimavaa 31-nik kissassuseqartilerlugu.
Kisianni aamma takuneqarsinnaapput qarmasissiat Kangerlussuarmi marrarmik sananeqarsimasut allagartat atortussallu akornanni:
- Sisimiuni Sisorartartut Peqatigiiffiata illua qarmasissianik Kangerlussuarmi marrarmik ikuallatamik sanaajuvoq, Lisa Johansen Namminersortuni Klimamut aamma Nukissiornermut immikkoortortaqarfimmi ataqatigiissaarisoq oqaluttuarpoq,
- Kalaallit Nunaanni qarmasissiat marrarmik assaalluni piiakkamik sananeqarsinnaapput. Nammineq taamaaliorsinnaaneq Danmarkimiit qarmasissianik imaatigut assartuititsinermut taarsiullugu, tamanna CO2-mik aniatitsinermut annikillisaaqataasinnaavoq. Kisianni taamaaliortoqassanersoq taamaaliortoqassannginnersorluunniit politikikkut aalajangigassaavoq. Uagut taamaallaat takutinniaannarpagut periarfissat aamma iluarsiissutissat pigineqartut, Lisa Johansen oqarpoq.
Saqqummersitat ilagaat qarmasissiaq oqorsaasiaq akuutissartaqanngitsumik sanaaq:
- Assersuutigalugu taassumunnga ilaalluarsinnaavoq Sermitsiaq, kalaallit qarmasissialiaannut ilaasoq, Lisa Johansen qungujulluni oqarpoq.