Kuupik Kleist: Isumaqatigiissutit nutarterneqassapput
USA-mik suleqatigiinnissamik isumaqatigiissut nalilerneqaqqissaaq Kalaallit Nunaatalu CO2-mik aniatitsineranik isumaqatigiissut qallunaat naalakkersuisuinik isumaqatigiinniutigineqaqqissaaq, decembarimi silap pissusia pillugu ataatsimeersuarnissaq sioqqullugu, naalakkersuisut siulittaasuat Kuupik Kleist oqarpoq.
Kalaallit Nunaata nunanik allanik peqateqarnera Kalaallit Nunaanni namminersortumi nunarsuarmiooqataanerulernissamik kajumissaaruvoq. Taamatut erseqqissaavoq naalakkersuisut siulittaasuat Kuupik Kleist, namminersornermut inatsisip tunniunneqarnerata kingorna tusagassiortunik katersortisinermi.
Aamma erseqqissarpaa USA-mik isumaqatigiissut, ilaatigut ilinniagaqartitsinikkut taarseeqatigiitsitsinikkullu, nalilersoqqinneqassasoq.
- Qularutiginngilara isumaqatigiissutit tamakkua ineriartortinnissaanik USA-mik oqaloqatigiittarnivut piviusut nangeqqikkumaarivut, isumaqarpungalu tamanna pissasoq qaammatit marlussuit iluanni, Kuupik Kleist oqarpoq.
Kalaallit Nunaata kissaatigaa CO2-mik aniatitsineq, Danmarkip siullermik itigartitaa, oqaluusereqqinneqassasoq, Kuupik Kleist oqarpoq.
- Aningaasarsiornikkut ineriartornissaq Kalaallit Nunaata pisariaqartippaa, ullumikkullu aniatitsisarnerput pissutigalugu imatorsuaq iliuuseqaresinnaanngilagut. Kalaallit Nunaata aningaasarsiornikkut ineriartornissaanik, taamalu Danmarkimik isumalluutikinnerulernissamik, pilersitsiniarpugut.
- Annertuumik iliuuseqassaagut angusassaq illua'tungeriit naammagisinnaasaat anguniarlugu. Apeqqummi tamatumani aaqqiagiinngissuteqalernissarput takorlooruminaatsippara, Kuupik Kleist oqarpoq.
Ministeriunerup Lars Løkke Rasmussenip neriorsuutigaa Kyotomik isumaqatigiissutip nutarterneqarnissaanut atatillugu oqaloqatigiinnerit nangeqqinneqarnissaannik Kalaallit Nunaata kissaatigisaa qaqinneqaqqikkumaartoq, aasap ukiallu ingerlaneranni isumaatigiissutit nutaat qanoq isikkoqarnissaat malunnarsiartulerpat.