Nuuk nutaamik ilisarnaatitaarpoq
Niels Motzfeldtip sanaava Inussuk inissisimaffiani najugaqarsimasunit uleerneqarpoq.
Regine Hansen aamma Marie Berthelsen eqqumiitsuliortoq Niels Motzfeldt sapaatiummat ualikkut inussummik meterinik tallimanik portussusilimmik uleersimmat ikiuupput. Inussuk Kuussuup isuani inissinneqarsimavoq Nuup Kangerluanut isikkivigeqisumi.
Regine Hansen aamma Marie Berthelsen illuannguami qorsummi ungasinngitsoq tikillugu tamaani inissisimasimasumi peroriartorsimapput, maanna tamaanga Inussuk inissinneqarpoq imaatigut angalasunik Nuummut tikikkiartortunik tikilluaqqusisussatut.
Niels Motzfeldt inussuliorsimavoq meterinik tallimanik portussusilimmik betongi, ujaqqat aamma kanngussak atorlugit ilisarnaasersuisimalluni. Napasuliat pingasut Nunatta inui avannaani, kitaani aamma kangiani ittut ilisarnaatigaat. Ujaqqat Nunatsinni tamaneersut oqaluttuaraat inuit ataatsimoortut.
Namminersornerup inussua Inussuk silaannakkut uuttorlugu Nuup ilisarnartaasa aappaanniit, Hans Egedemut eqqaasutissamiit meterinik untritilinnik marlussunnik ungasitsigaaq, taakkulu eqqaassutissat marluk immikkut Nunatta oqaluttuassartaa assigiinngitsumik nalunaarpaat.
ATUARUK ALLAASERISAQ: Meeqqat amisut assut nuannaraat