Miss Inuit 2009 unammineq septembarimi
AG.gl-ip Nunatsinni arnat pinnersut nersorniarpai septembarimi unammineq Miss Inuit ingerlanniarlugu.
Pinnerneqqusaanneq pisariitsumik ingerlanneqarniarpoq, arnat pinnerneqqusaannermut peqataaniartut assiminnik marlunnik pingasunilluunniit AG.gl-imut nassitsissapput. Taamatut allapput ag.gl-imi.
AG-mit erseqqissaatigineqarpoq pinnerneqqusaannerup torersumik ingerlanneqarniarnera, tassami pingaanerutillugu qitiutinneqarniarmat kiinaq aamma inuup isikkumigut kinaassutsiminik takutitsinera.
Tassa imaappoq arnat atisatik alutorinerpaasatik ateriarlugit assilisissapput - siffissaminniit qummut kiisalu naatsumik imminnut oqaluttuaralutik taanna ilanngullugu nassiutissavaat.
18-inik ukioqalereersimanissaq piumasaqaatavoq.
AG.gl-imit immikkut saqqummersinneqassaaq ilanngussaq Miss Inuit, tassani peqataasut assingi saqqummersinneqassapput.
Atuisut assit tunngavigalugit taasissapput, taamaalilluni ag.gl-imik atuisut aalajangissavaat kina Miss Inuit 2009-mi toqqagaassanersoq. Pinnerneqqusaanneq aallartippat suna eqqugassaassanersoq nalunaarutigineqarumaarpoq.
Ukiup ingerlanerani kingusinnerusukkut Mr. Inuit 2009 toqqarneqarumaarpoq.