Skip to main content

Aaqqissuisutoqaq 85-iliivoq

Tusagassiortoq, atuakkiortoq, taalliortoq aamma AG-p ukiuni 25-ni aaqqissuisorisimasaa sapaatiuppat 28. juuni akunnaalliliingajassaaq.

Jørgen Fleischer peqqilluni 85-inik ukioqalerluni inuuissiussaaq qularinavianngilaallu uagut tamatta ataatsimut eqqaamallaqqittorigitsinni.

Kuisinnermut allagartaa kajortereersimavoq. Kisianni qarasareqaaq aallaataalu suli inngigeqaluni. Naak qangamut naleqqiullugu aalassarippallaanngikkaluarluni, ukiuisa allakkusussusia imaluunniit oqallitsitserusussusia innarlersimanngilaat. Oqaaseqaatit aamma isummersuutit angerlarsimaffiani Jens Kreutzmannip Aqqutaa 26-mi suliffianiit takkuttuartarput. Naallu pilikkip allaatillu nalaani peroriartorsimagaluarluni ullumikkut Cyberspacemi (qarasaasiamik atuineq) nalinginnaasutut isigalugu ingerlappaa.

Angut tassaavoq soorlu atuagaq oqaluttuanik imalik qupperaannagassaq assersuunneqarluarsinnaavorlu inuttut soorlu ukiuni akullerni inuusimasoq suli akornatsinniittoq. Eqqaamannissinnaanera imikkut illuinnartuuvoq. Taalliortutut oqatigilluaannarlugu angut taanna nagguaatsutut eqqaamasinnaavoq.

Uummannap eqqaani Ikerasammi naalungiarsuusoq ilimasuutigineqanngilaq Kalaallit Nunaanni atuakkiortut annersaasa ilagilissagaat atuakkanik arlalippassuarnik saqqummersitsisimasoq. Kalaallit Nunaannut tunniussarai oqaluttualiat, oqaluttuaaraliat soqutiginartut kiisalu inunnik assorsuaq nuannarineqartut erinarsuutit aamma taallat.

Tamakkununnga ilutigitillugu tusagassiortutut suna tamaat tikillugu peqataasimavoq. Aallakaatitassiarpassuit aamma allaaserisarpassuit ingerlavimmini suliarisimavai. Eqqumiilaartumik qungujussutaasinnaasumillu tusagassiortunngornera aamma nalinginnaanngilaq. Nammineq nuannarilluinnartarpaa oqaluttuarissallugu tugassiortutut sulilernini tupakuluusimik, illuatungaanik puaarneqarnerminik kinguneqartumik patsiseqartoq. Nunaqarfimmi meeraasimasoq Nuummut Seminariamut atuariartortinneqarpoq. Grønlandsministeriamilu taanna nukappiaq nunaqarfimmioq atualeritoorujussuaq, TB-eersimanerminik sanngiillisimasoq, sussanerlugu nalulerpaat. Taamaattumik ministeriamiit isumaliorput tusagassiortuuneq tassunga naleqqutissajunnarsisoq.

Oqartoqartariaqarporlu tamanna ministeriap eqqortumik eqqoriaanerisa ilagisimagaat. Allallaqqissutsi aamma oqaluttuallaqqissutsi danskit aviisini ullormut saqqummersartuni arlalinni pitsanngorsariarlugu, Kalallit Nunaanut uterpoq uagutsinut tamatsinut iluaqutaasumik nuannaarutaasumillu. Inuunermini sivisuumi uagut tamatta aliikkusersortarsimavaatigut aamma tamatta ilisimasaqarnerulaalersittarluta.

Qularisassaanngilarlu politikkimik soqutiginnittuunini pissutigalugu taava nuannaarutigisimassavaa namminersornerup eqqunneqarnera nammineq 85-inik ukioqalerluni inuuissiornissaminut sapaatit akunneranik ataatsimik sioqqutiinnarlugu.

Tamakkununnga ilutigitillugu aaqqissuisutoqqap nuannaarutigissavaa, eqiasuilluni atuagarpassuit allassimasani aamma tusagassiortutut suliapassuani pillugit inuiaqatigiit namminerminut ataqqinninnerat. Nersornaasigaavoq sorpassuarnik assigiinngitsunik. Nersornaatigai Ridder af Dannebrog, Namminersornerullutik Oqartussat nersornaasiuttagaat kuulti aamma Namminersornerullutik Oqartussat kulturikkut nersornaasiuttagaat pissarsiarisimallugu.

Maani Sermitsiap aaqqissuisoqarfianiit Jørgen Fleischer, Juuluaraq, pinngitsoornata nipituumik hurraarutigissavarput, tassami 1987-imiilli Kalaallit Nunaanni inuunerup ingerlanera aalajaalluni allaaserisarsimavaa. Tamatumunngalu ilutigitillugu aammattaaq qamannga pisumik qutsaviginiarparput Sermitsiap pilersinneqarneranut ukiut 51-it matuma siornatigut peqataasimammat. Tassa ikinngussuani maannakkut toqukukkut qimagutereersimasoq Peter "Coorbut" Kreutzmann peqatigalugu aviisi tunngavilersimammagu. Taamaaliorsimavoq A/G-mi sulisuulluni tassami qulakkeerniaramiuk killilersorneqarnani isummersorsinnaanissani aviisip naalagaaffimmit pigineqartup avataatigut. Kisianni oqaluttuaq taanna allarluinnaavoq...

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER