Qinngasaarisarneq Unitsilli Nunatsinnut pissaaq

Meeqqat tamarmik ajunngitsumik inuuneqarnissamut piginnaatitaaffeqarput, tamaattumik suliniut nutaaq Qinngasaarisarneq Unitsilli aallartinneqassaaq. Suliniut Mary Fondenimit ingerlanneqartoq.

Nalunaarusiami "Kalaallit Nunaanni Meeqqat" inerniliussaavoq Kalaallit Nunaanni meeqqat amerlasuut meeraqatimik avataaniittutut misigisimasartut kiisalu ulluinnarni atugasissaarnissamut aamma meeraqatiminnik ataatsimooqarteqartanissaminnik ajornartorsiortartut.

- Mary Fondenimi neriuutigaarput, uagut Kalaallit Nunaanni ataatsimeeqattaarnivut meeqqerivinni aamma ilinniartitaanerup iluani suliniuteqartunik sanngisuunik pitsaasumik suleqatigiilernissamik kinguneqarumaartoq. Uagut neriuutigaarput Kalaallit Nunaanni Qinngasaarisarneq Unitsilli suliaq ingerlassinnaassallutigu aammalu tunngavilerluarsinnaassallutigu - kiisalu ataatsimut peqatigiilluta Kalaallit Nunaanni meeqqat akornanni atugarissaarneq toqqissisimanerlu siuarsarsinnaassallutigu. Qinngasaarisarneq Unitsilli suliniutaavoq uagut assorsuaq nuannaarutigisarput, kiisalu tamanna Kalaallit Nunaanni taamatut ingerlatsinermut peqataarusuttunit taamatuttaaq nuannaarutigineqarluni ilassilluarneqarpoq. Suliniummi naleqartitat meeqqat ataatsimoorlutik sammisaqaqatigiinnissaannut tunngaviulluartussat qitiutinneqarput, taamaattumillu tamakku maannakkut Kalaallit Nunaanni meeqqat atuarfiini aamma atuartunngornissamut piareersarnermi aaqqissuusseqqinnernut ingerlanneqartunut naleqqullutik, Mary Fondenimi siulittaasoq Kunngikkormiutut Ataqqinassusilik Kronprinsessen oqarpoq.

Qinngasaarisarneq Unitsillimik kalaallit aallartitsinissaannut ingerlatsinermik aqutsisussat toqqarneqartut tassaapput:

Direktør Birgitte Hagemann Snabe, Mary Fonden, generalsekretær Mimi Jakobsen, Red Barnet, naalakkersuisoqarfimm pisortaq Lise Lennert Olsen, Kultureqarnermut, Ilinniartitaanermut, Ilisimatusarnermut, Ilageeqarnermullu Naalakkersuisoqarfik, pisortaq Martha Labansen, KANUKOKA, pisortaq Aaja C. Larsen, Tungiuinermut Ingerlatsivik, Sermersooq Kommune.

Ingerlatsinermik aqutsisussat suliap ingerlanneqarnissaanut suliassaq siulleq aallartissavaa sumiiffimmut naleqqussaaneq tamatumani eqqarsaatigineqarlutik kalaallit kulturiat, aaqqissuussaaneq, oqaluttuarisaaneq aamma oqaatsit. Tamatumalu kingorna misileraaneq ingerlanneqassaaq, taassuma ingerlanneqarnerani naleqqussaanerit ataavartumik ingerlanneqassapput, naggataatigut suliniutip ingerlanneqarnerani immikkoortut pingajuat tikinneqassaaq tassalu ingerlanneqarnissaanut piareersaatit kingulliit naammassippata pilersaarut aallartinneqassaaq.

Powered by Labrador CMS