Kalaallit Nunaannut helikopterit nutaat

Oqaluttuarisaanermi aatsaat taamak atitutigisumik illersornissaq pillugu isumaqatigiittoqarpoq. Ilaatigut tamatuma kinguneraa Kalaallit Nunaani nutaanik helikoptereqalernissaa.

Kalaallit Nunaata silaannartaani Lynx takussaajunnaartussanngorpoq. Assiliisoq: Peter Hove Polfoto

Illersornissaq pillugu aatsaat taamak atitutigisumik isumaqatigiittoqarpoq akuerineqarnerani taaseqataapput SF-imiit DF-imut. Isumaqatigiissutip kingunerisaanik sakkutooqarneq ukiuni tallimani aggersuni milliardinik pingasunik aningaasaliiffigineqassaaq.

Kalaallit Nunaanni Sakkutooqarfik eqqarsaatigalugu isumaqatigiissutip kingunerisaanik nutaanik qulimiguulinnik pissarsitineqassaaq. Maannakkut qulimiiguullit Lynxit atorneqartunut taartaassapput angalassinermut, alapernaarsuinermut, ujaasinermut aamma annaassiniarnermut atorneqartussaallutik.

Isumaqatigiissummi aammattaaq siunertaavoq issittumi ataatsimut sakkutooqarfeqalernissaq Grønlands Kommando aamma Færøernes Kommando eqqarsaatigineqarlutik. Tamatuma saniatigut aamma sulissutigineqarpoq Pituffiup annertunerusumik atorneqarnissaa illersornissamut tunngasunik suliassanik naammassinnittoqassatillugu. Kiisalu eqqarsaatigineqarpoq issittumi sakkutooqatigeeqalernissaa nunanit issittumiittunit tamanit peqataaffigineqartussaq.

Eqqarsaatigineqartoq tassaavoq ataatsimut sakkutoqatigeeqalernissaq timmisartunik sorsuutinik atuisinnaasunik pisariaqartillugu suliassanik naammassinnittartussanik soorlu alapernaarsuinernik kiisalu Kalaallit Nunaanni eqqaanilu oqartussaassuseqarnerup takutittariaqarnerani atorneqartartussanik.

Isumaqatigiissut illersorneqarnissamut tunngasoq 2010-miit 2014 ilanngullugu atuutissaaq.

Powered by Labrador CMS