Paamiuni KNI-p iffiorfia matuvoq

Inuussutissanik tunisassiornermi nakkutilliisut Paamiut KNI-p iffiorfia matuaa, eqqiluisaarnissamut piumasaqaatit eqquutsitsinneqarsimanngimmata.

Assiliisoq: Michael Mottlau/Polfoto.

Inuussutissanik tunisassiornermi nakkutilliisut Paamiut KNI-p iffiorfia matuaa, eqqiluisaarnissamut piumasaqaatinik eqquutsitsisarsimanngimmata. Illoqarfimmi iffiorfitoqaq piffissami aalajangiiffigineqanngitsumi matoqqassaaq.

– Arlalitsigut pingaaruteqartunik kukkuneqarnera amigaateqarneralu pissutaapput, uumasut nakorsaanerat Mads Thor Madsen knr.gl-imut oqarpoq.

KNI-lli Paamiuni iffiorfiutimi matuneqarnissaa siornatigut eqqarsaatigisareersimavaa.

– KNI-mi iffiorfiup matuneqarnissaa sivisuumik eqqarsaatigineqarsimavoq, illup, teknikkikkut taamaalilluni eqqiluisaarnissamut tunngasut pissutigalugit. Pisoqqamut iffiorfimmut taarsiullugu mikinermik bake-off-imik peqalernissaa eqqarsaataavoq. Kisianni pilersaarutit tamakku illoqarfinni allani aningaasaliinerit pissutigalugit kinguartinneqartarsimapput, KNI-p pisortaa Frederik Olsen knr.gl-imut oqarpoq.

KNI'p pisortaata matusineq ajuusaarutigaa, kisianni maannakkorpiaq oqaatigisinnaannginnerarpaa bake-offimik iffiorfittaarnissap qaqugu pinissaa.

Powered by Labrador CMS