Ilinniarnertuunngorniartut sermersuarmi
Ilinniarnertuunngorniarfinni Kalaallit Nunaanni, Danmarkimi aamma USA-mi atuartut amerikarmiut klima pillugu ilisimatusarnerat sermersuarmi ilisimatusarnermik ingerlatsivimmi Summit Campimi malinnaavigissavaat.
Kalaallit Nunaanniit peqataasussat tassaapput Inalunnguaq Brandt, Sisimiut aamma Hanne Dorph, Ilulissat. Taakku marluullutik Avannaani Ilinniarnertuunngorniarfimmi ilinniartuupput marlunngormallu kemimi ilinniartitsisortik Tom Kock Svennesen ingiaqatigalugu Kangerlussuarmut tikipput.
USA-mit peqataapput atuartut marluk aamma ilinniartitsisoq ataaseq naalagaaffimmi New Yorkimi Niskayuna Highschoolimeersut, qallunaat atuartut Københavnimi gymnasiameersuupput, taamak ilisimatitsivoq Bo Gregersen ilisimatusarneq pillugu Københavnimi amerikarmiut aallartitaqarfianni suleqataasoq.
Angalasut sisamanngorpat US Airforcesip timmisartorsuanut Herculesimut ilaallutik sermersuarmut ingerlassapput, sapaatip tungaanut tamaaniissallutik.
Summit Camp ilisimatusarnermik ingerlatsiviuvoq amerikarmiut National Science Foundation (NSF) ataani ingerlanneqartoq, tamanna iisimatusarnermik ingerlatsisunik nunarsuarmi tamarmeersunit peqataaffigineqarpoq, sermersuarmillu qillerinerit ingerlanneqarput ilaatigut silaannaap pissusiata allanngoriartornerata siunissami qanoq ingerlanissaa paasisaqarfiginiarlugu.
Tamaani peqataatinneqarnissaannut pissutaavoq sermersuarmi tunngaviusumik ilisimatusarneq qanoq ingerlanneqartarnersoq ilinniagaqartunut takutinniarneqarnera. Tamaarsimaafimmiinnerminni peqataasut teknologi nutaaliaanerpaaq atorlugu nunarsuarmioqatigiit misigisatik pillugit oqaluttuutissavaat.
Ingerlanneqartussat ilagaat Webi-nar (webimi toqqaannartumik akineqarsinnaanngitsumik-saqqummiussineq); ilinniartitsisut misigisatik pillugit PolarTREC-ip nittartagaani oqaluttuassapput (takuuk http://www.polartrec.com/greenland-education-tour-09); peqataasullu ullaat tamaasa aamma unnuit tamaasa 'twitte'-neq ingerlattassavaat (www.twitter.com) aqqutigalugu. Summit Camp pillugu sukumiinerusumik uani www.summitcamp.org atuarsinnaavutit, tassanilu aamma tammaarsimaffimmi toqqaannartumik assiliivik takuneqarsinnaavoq.
Kalaallit ilinniagaqartut ukiut pingajussaat tulleriiginnarnik Summit Campimut tikeraarput. Suliniut Joint Committee ataani ingerlanneqarpoq tamatumani siunertarineqarluni Kalaallit Nunaata aamma USA-p ilisimatusarnermut, avatangiisinut aamma teknologimut aamma ilinniartitaanermut tunngatillugu suleqatigiinnerat annertusarniarlugu.