GLK Ikkami ikiuuppoq

Kangilinnguani Sakkutooqarfik ukioq manna ilisimatusarnermut ikiuuteqqippoq, ilisimatusartut immikkut illuinnartut immap naqqani sukarsuit ikkait misissugaraat Arsuup kujataani kangerlummi Ikkami.

Ilisimatusarnermik ingerlatsisut Københavnip Universitetianeersut ukiuni arlalinni ikait sukat ilisimatusarfigaat sukanilu uumasut, naasut aamma bakteriat nassaarisimallugit, sumiiffinni allani nassaassaanngitsut. Assiliisoq: adventure.dk

Sukanik pissanganartunngortitsisut tassaapput taakku iluiniit sequmiasuniit imeq nillertoq nunap iluaneersoq basiskiusoq nungujartortitsisartoq aniammat, Nunarsuarmilu sumiluunnit allami taamaattunik nassaassaqanngimmat, tassa nillerlutillu basiskiusunik taamaattumik ikkait sukarsuini uumassusileqarpoq immikkut illuinnartunik, forsvaret.dk allappoq.

Uumassusillit peqqarneeqisumik avatangiiseqarlutik uumanissaq naleqqussarfigisimavaat, taakkulu ilisimatuunik ilisimatusartunik soqutigineqaannanngillat, aammali Kalaallit Nunaanni piupput uumassusillit suli atorneqanngitsut.

Tassami bakteriat aamma taakku akui enzymit tunisassiornermi assigiinngitsorpassuartigut atorneqarsinnaapput, tassami enzymit Kalaallit Nunaanneersut iluaqutigalugit tunisassiornerit aningaasatigut akilersinnaanerusumik aamma eqqiuinnerusumik ingerlanneqalersinnaapput.

Ilisimatusarnermik ingerlatsisut Københavnip Universitetianeersut upernaaq manna enzym bakteriamit nutaameersoq, Alkalilactibacillus, piginnittuuffigilersimavaat, taanna taamaallaat Ikkami nassaassaavoq. Enzymi immuup sukkuanik nungutitsisinnaavoq, taamaalillutik inuit immuup sukkuanik arrortitsisinnaanngissusillit immuttorsinnaalissapput.

Kisianni naak ilisimatusarnermik ingerlatsisut enzymimik piginnittunngorsimagaluartut, taamaattoq Kalaallit Nunaat tassaavoq Riomi isumaqatigiissut malillugu enzymimik iluanaarniuteqarsinnaasoq, taamaalilluni tamatuminnga atuinermut akiliutaajunnartunik isaatitsisinnaasoq.

Ikkamili mineralit kiassutsimut 6° C qummut qaangerlugu qajannarsisarpoq taammattumik ilisimatusarnermik ingerlatsisut misissorpaat, nunarsuaq tamakkerlugut kissatsikkiartornernup kingunerisaanik sukarsuit piuneerunneqassanersut.

Aqqartartut sukat iluinut uuttortaatinik qillerillutik ikkussuisimapput, taamaalillutik ilisimatusarnermik ingerlatsisut sukani kissassuseq ukioq kaajallallugu uuttortarsinnaavaat. Uuttortaanerup inernerata siulliup takutippaa siorna 6 °C-it qummut qaangerneqalaartoq, taamaattorli ukiup sinnerani kissassuseq marluk - sisamallu °C-it akornanniilluni. Tamatumunnga ilutigitillugu aqqartartut oqaluttuarisinnaavaat sukat talliartorsimasut, naak aasap ingerlanerani sapaatit akunnerini marlussunni kissassutip ernumanartut 6 °C-it qummut qaangersimasimagaluaraa.

Ukioq manna uuttuineq kingulliuvoq uuttuutillug qaqinneqassapput misissorneqarlutillu.

- Issittumik ilisimatusarnermik ingerlatsineq ajornakusoortorujussuuvoq. Immaqa uagut ikait-nik aamma bakterianik GLK ikiortiginagu katersuisinnagaluarpugut, kisianni taamaalioraluarutta assut ajornakusoorsimassagaluarpoq akisoqalunilu. Ukiut ingerlanerini GLK-miit ikiorneqarluartarsimavugut uagullu ilisimatusarnitsinni, neriuutigisinnaasatsinnit siuaqqanerujussuuvugut: Bakteriat nutaat pingasut taaguusersimavagut aamma ikkait sukaanni uumasuaqqat ilisimaneqanngitsut arlallit nassaarivagut, uagut enzyminik assigiinngitsunik nassaarsimavugut ataaserlugu piginnittussaaffigilersimallutigu, - enzymi taanna Alkalilactibacillusiminngaanneersuuvoq, lektor Peter Stougaard Ikkami suliamik ingerlatsinermi pisortaq.

Powered by Labrador CMS