Meeqqat erinarsornermik unammisinneqartut

Qeqertarsuarmi meeqqanik Meeqqat Ulluannut atatillugu erinarsornermik unammisitsinermik aaqqissuussisoqarpoq. Piginnaanillit tulleriiaaginnavipput, allaat ajugaaniutivinnermi peqataasussat amerlisariaqarlutik.

Ajugaasut Arnarissoq aamma Gitte akissarsiatik tigummillugit. Assiliisoq: Saalamiit Møller Lorentzen

Unammisitsineq tallimanngornermi aamma arfininngornermi ingerlanneqarpoq meeqqat ulluannullu atatillugu komitemit aaqqissorneqarluni.

Meeqqat katillugit aqqaneq marluk peqataapput, niviarsiaqqat aqqanillit nukappiararlu ataaseq, kingullerlu alutorsartitseqaaq, Saalamiit Møller Lorentzen, aamma assiliisuusoq, oqaluttuarpoq.

Meeqqat arfineq pingasut ajugaaniutivinnermut anngupput, naak tassani arfiniliinnarnut inissaqaraluartoq, kisianni aalajangiisuusussat dommerit Maritha Broberg, Christine Denbæk aamma Jospal G-mi erinarsortartoq John Geisler unammisut naligiittorujussuunerarmatigik taakku arfineq pingasut ajugaaniutivinnissamut anngutsinneqarput.

Dommerit akunneq ataaseq atorlugu aalajangiiniarsaripput kikkut pingasut ajugaasinneqassanersut, tassalu: Arnarissoq Møller aamma Gitte Olrik Olsen Kidsit atortagaat 'Upernalaannguaq' atorlugu, Hans Otto Mølgaard kiisalu siorna ajugaasoq Ivalu Brandt.

Unammisitsineq naammassineqareermat nuannarineqarluartut Jospal G aamma Don Maliko kiisalu Ikiuna, Olsen Kidsineersoq tusarnaartitsipput.

Powered by Labrador CMS