Kleist iluaqutaassaaq
Kalaallit Nunaanni qinersineq namminersornissarlu, Kalaallit Nunaata Danmarkillu akornanni politikkikkut peqatigiinnikkut pitsaanermik kinguneqassasoq. Folketingimi Kalaallit Nunaat pillugu oqaaseqartartut arlallit isumaqarput.
– Qularnanngitsumik iliuuseqarfiginnittarnissanik qunusaarineq qaangissavarput, de konservative-neersoq Per Ørum Jørgensen oqarpoq.
Kalaallit Nunaanni isumaginninnermi pissutsit kingullermik oqallisigineqarneranni naalakkersuisooqatigiit Kalaallit Nunaata tungaanut pillaatitut iliuuseqarnissamik eqqussingajaqqinnaarput.IA’lli ajugaarujussuarneratigut, Kuupik Kleistilu naalakkersuisunut siulittaasunngortussatut siunissaq Per Ørum Jørgensenip qaamanerusumik isigilerpaa.
– Isumaqarpunga oqaloqatigiinneq pitsaanerulissasioq, siunissamilu attuumassuteqarnerit eqqarsaatigalugit isumalluartorujussuuvunga, oqarpoq.
Aamma Danska Folkepartiimit Søren Espersenip siunissami suleqatigiinnissaq isumalluarfigaa.
– Nunat marluk akornanni suleqatigiinneq pitsaaneruliinnarsinnaavoq. Hans Enoksenip nalaani oqalleqatigiinneqartarnngilaq oqallinneqartaraniluunniit, oqarpoq.
Ilassutigaa ajunngilluinnartoq Kuupik Kleist naalakkersuisut siulittaasunngussammat.
Danskillu partiivi arlallit maanna qinersineq naammassimmat namminersorneq qilanaaraat.
– Namminersorneq sapaatit akunnialunngui qaangiuppata eqqunneqartussaq aqqutigalugu Kalaallit Nunaat nutaanik Inatsisartoqalerluni naalakkersuisoqalerlunilu Nunat avannaarliit nunarsuullu sinneranut eqeersimaartumik ilaalissaaq. Kalaallit Nunaat qitiulluinnartumik inissisimavoq, silaannaap allanngoriartornerani suliassat tungaasigut kiisalu taassuma malitsigisaanik illersornissamut politikkip nutaap tungaanut, Enhedslistenimit Line Barfod oqarpoq.
Aamma Radikale-nit Niels Helveg Petersenip namminersorneq ineriartornermi pissusissamisoorsoraa.
– Isumaqartuarsimavunga namminersorneq pillugu inatsit Kalaallit Nunaata aamma Danmarkip akornanni suleqatigiinnerup ineriartortinneranut pitsaasuusoq, oqarpoq.